Merkatu arautuko bezeroek 216 euro ordainduko dute gaur argindarraren megawatt-ordua

Handizkako merkatuan argindarraren prezioak marka guztiak hautsiz hasi da urria, eta historian lehen aldiz megawatt-ordua 200 euro baino gehiago ordainduko da; zehazki, merkatu arautuan dauden bezeroek 216,01 euro ordainduko dute MWh-a, atzo ordaindu zutena baino % 14 gehiago, beraz atzo 189,90 euro ordaindu baitzen

Iazko urriko lehen ostiraleko prezioa (24,80euro) halako zortzi da gaur merkatu arautuan argindarraren prezioa. 

Marka berri honekin argindarraren prezioak gora egiten jarraitzen du, irailean zortzi errekor zenbatu ondoren. Batez beste 156,15 euro ordaindu zen megawatt-ordua, orain arteko hilabeterik garestiena bihurtu zen, hala.

Ordu-tarteen arabera, gaur 22:00etatik 23:00etara  izango da garestien argindarra, 230 euro/MWh, eta 15:00etatik 18:00tara, berriz, merkeen, 198,77 euro/MWh.

Europako zati handi bati eragiten dion prezioen igoera ziklo konbinatuko zentraletan erabiltzen den gasaren nazioarteko merkatuen garestitzearen ondorio da, hark ezartzen du, merkatuaren prezioa eguneko ordu gehienetan, bai eta karbono dioxidoa isurtzeko eskubideen prezioaren igoera ere. 

Nola jakin zure fakturan eragiten duen? 

Prezioen igoerak, momentuz, merkatu arautuko bezeroei soilik eragiten die, 11 milioi bezero estatu espainiarrean; ez ordea merkatu libreko beste 17 milioi bezeroei. 

Merkatuen eta Lehiaren Batzorde Nazionalaren (CNMC) 2020ko bigarren seihilekoek Etxeen Panelaren arabera, bezeroen % 63,3k ez daki zein merkatutan dagoen kokatuta bere kontratu elektrikoa. 

Bi modu daude kontratatutako tarifa mota zein den jakiteko. Argindar konpainiaren fakturan, konpainia edozein dela ere, beti agertzen dira kontratuari buruzko xehetasunak. Kontratu motaren atalean "PVPC tarifa edo tarifa arautua" jartzen badu, horrek esan nahi du merkatu arautuan zaudela, eta, beraz, argindarraren prezioaren gora-beherek eragina izango dutela zure faktura. Halakorik agertzen ez bada, merkatu librean zauden seinale. 

Merkatu arautuak PVPC (Kontsumitzaile Txikiarentzako Borondatezko Prezioa) tarifa baino ez du eskaintzen; merkatu librean aldiz bestelako eskaintza eta tarifak aurki daitezke, tarifa lauak edo 24 ordutarako prezio finkoak, esaterako. 

Gure kontratua merkatu arautuan ala librean dagoen jakiteko beste modu bat argindar konpainiaren izenari erreparatzea da; izan ere izen desberdinak hartzen dituzte merkatu batean eta bestean. Hala, Iberdrola Iberdrola Clientes S.A.U. gisa agertzen da merkatu librean eta Curenergía Comercalizador de Último Recurso S.A.U. PVPC tarifapeko bezeroentzat. Endesak Endesa Energía S.A. izena hartzen du merkatu librean eta Endesa Energía XXI, S.L.U. merkatu arautuan. Naturgy, berriz, Naturgy Iberia S.A. gisa agertzen da merkatu librean eta Comercializadora Regulada Gas & Power, S.A. arautuan. EDPren kasuan, merkatu librean EDP Energía S.A.U. gisa agertzen da eta Baser Comercializadora de Referencia, S. A. gisa merkatu arautuan. Azkenik, Repsolek Repsol Comercializadora de Electricidad y Gas S. L.U. izena hartzen du merkatu librean, eta Régsiti Comercializadora Regulada, S. L. U., arautuan.

Hala ere, zalantzak izanez gero, horiek argitzeko modurik zuzenenean enpresari berari galdetzea litzateke.