Diazen ekimenarekiko kritiko azaldu da Tapia: "Prezioa ezin da ekoizpen kostuaren azpitik egon"
Arantxa Tapia Eusko Jaurlaritzako Ekonomiaren Garapen, Jasangarritasun eta Ingurumeneko sailburua kritiko azaldu da Yolanda Diaz Espainiako Gobernuko presidenteordeak inflazioari aurre egiteko martxan jarritako ekimenarekiko —banaketa zentro handiekin batera, bilera batzuk egiten ari da oinarrizko elikagaien prezioa mugatzeko asmoz—, eta esan du "kontuz" ibili behar dela, lehen sektorearen interesak defendatuz. "Ezin da inolaz ere adostasunik lortu prezioak ekoizpen kostuaren azpitik", ohartarazi du.
Euskadi Irratiko "Faktoria" saioan egin dioten elkarrizketan azaldu duenez, "gauza asko kontuan" hartu behar dira prozesu horretan, eta horren ildotik, zehaztu du Euskadin badela mekanismo bat, Behatokia izenekoa, ekoizpen kate ezberdinetako prezioak aztertzen dituena. "Bakoitzak bere kostuak eta prezioak ditu. Elikadura katearen legearen arabera, ezin da saldu ekoizpen prezioaren azpitik. Kontuz prezioak adostearekin ere, lehia askearen kontra arituko baikinateke, eta kontuz gure ganaduzale eta nekazariekin ere. Guk gurera jarraituko dugu, gure sektorearekin lanean", erantsi du. Tapiaren hitzetan, ekoizleek ezin dute inflazioaren krisi hau ordaindu.
Horren harira, iragarri du arratsaldean bilera duela lehen sektoreko ordezkariekin. Berez, energiaren kontingentzia planari egindako ekarpenak jasotzeko batzartuko dira, baina prezioen auzia eta lehortearen ondorioak ere izango dituzte mahai gainean.
Krisi energetikoa hizpide, azpimarratu du Jaurlaritzak efizientzia energetikoaren eta energia berriztagarrien aldeko hautua eginda duela. Azken horren kontura, gogora ekarri du Europak 2030 urterako 500 gigawatt eolikoen bidez ekoitzi behar direla zehaztu duela eta, horren aurrean, "arduraz" jokatu behar dela nabarmendu du, "proiektuak azkarragotzen".
Halaber, argitu du etxe partikularretan zein lehen sektoreko ustiapenetan eguzki plakak jartzeko laguntzak martxan daudela, eta etorkizun hurbilean "proiektu asko" daudela ikusten badute, laguntzak "areagotuko" dituztela agindu du, baita komunitate energetikoak sortzeko aukera ere.
Ukrainako gerrak negu honetako gas horniduran izan ditzakeen ondorioez galdetuta, Tapiak azaldu du Euskadik baduela "gas nahikoa" datozen hilabeteetarako, azpiegiturak badituelako hura jaso eta erabili ahal izateko, baina "egoera oso aldakorra denez, ezin esan guztiz bermatuta izango dugula negu osoan". "Ahalik eta gutxien erabili behar dugu, eta tentuz eta zentzuz erabili", gaineratu du.
Albiste gehiago ekonomia
Espainiako Gobernuak baztertu du aireportuen kudeaketa osorik Euskadira transferitzea
Diario Vasco egunkariak argitaratu duenez, Eusko Jaurlaritzak erabaki estrategikoetan iritzia eman ahal izatea proposatu du Espainiako Gobernuak, baina eskualdatzea osorik egitea baztertu du, Estatuaren eskumen esklusiboa delako.
Azkoitiko Juaristi eta Aitek enpresetako langileek bizi duten "egoera jasanezina" salatu dute
Orain urtebete inguru lehertu zen lan-gatazkaren berri emateko, agerraldia egin dute bi enpresetako langileek. Uste dute zuzendaritzak "ezkutuko itxiera plan bat" duela. 130 lanpostu eta hainbat familia "arriskuan" daudela salatu dute.
Lodosako Karey Solanok konkurtsoa egingo du, eta lantegia itxi eta 36 beharginak kaleratuko ditu
Langile gehienak oso aspaldi hasi ziren lanean, eta batez beste 50 urtetik gorakoak dira. CCOOk salatu du oraindik ez dutela abuztuko nomina jaso.
Ostiralean sei hilabete beteko dira Gasteizko lorezainek grebari ekin ziotenetik, eta manifestazioa deitu dute egun horretarako
Gaur goizean Gasteizen egindako prentsaurreko batean, Enviser enpresako langileek "borrokarekin jarraitzeko" asmoa agertu dute, "soldata duinak lortu arte". Gainera, langileak akordiorako prest agertu dira, baina hori lortzeko "Gasteizko Udalaren benetako inplikazioa" beharrezkoa dela uste dute.
Zeintzuk dira BBVAren eskaintza berriaren gakoak?
Josu Ferreiro EHUko irakasleak Radio Euskadin egin duen elkarrizketa batean adierazi duenez, erakundeak Kataluniako bankuko akziodunen zati handi batek eskatzen zuenera egokitu du bere proposamena, lehen eskaintzari uko egin baitzioten, nahikoa ez zelakoan. Ferreirok zehaztu duenez, BBVAk ez du eskudirutan ordainduko, akzio propioetan baizik, eta horrek abantaila fiskala dakarkie akziodunei, zergak gutxiago ordaintzea dakarrelako. Mugimendu horrekin, Carlos Torres Vila buru duen bankuak Sabadellen akzioen merkatuko balioa berdindu du, eta horrek opak aurrera egiteko aukerak areagotu ditu, nahiz eta BBVAri berari kostu handiagoa ekarri. Hobekuntza berri bat egon litekeen galdetuta, ekonomialariak uste du zaila dela: "BBVAk argudiatu zuen Sabadellen akzioak gainbaloratuta zeudela. Orain, alde hori desagertu egin da. Beste eskaintza bat baztertu beharko litzateke, hau izango litzateke azkena", adierazi du. Elkarrizketa Boulevard saioan entzun daiteke, GUAUn, 02:50: 00etatik aurrera (jatorrizkoa, gaztelaniaz).
2026an jarriko da martxan Petronorren eta OCO Technologyren agregakin sintetikoen planta, Bilboko Portuan
Proiektua 2024an hasi zen eraikitzen, eta Europa kontinentalean agregakin sintetikoak fabrikatuko dituen lehen lantegi industriala izango da. Agregakin horiek CO2 gasa harrapatzen dute, bai ekoizpen prozesuan zehar, baita horien bizitza baliagarrian ere.
BBVAk % 10 igo du Sabadell bankua eskuratzeko eskaintza
Carlos Torres BBVAren presidenteak azpimarratu duenez, hobekuntza eginda "aparteko eskaintza" jarri dute Banco Sabadellen akziodunen esku, "balorazio eta prezio historikoarekin, eta bi bankuen batasunarekin sortutako aukera apartan parte hartzeko aukerarekin". Sabadellek, bere aldetik, erantzun du azken eskaintza "jatorrizkoa baino okerragoa" dela.
Maderas de Llodio, greba mugagabean
Langileen batzordeak salatu du enpresak produkzioaren % 40 beste lantegi batzuetara eramateko asmoa duela, eta deslokalizazioak Laudioko eta eskualdeko "lantegiaren etorkizuna arriskuan jartzen" duela.
Multiverse Computingek % 30 handituko du bere lantaldea Donostian
Software kuantikoan eta adimen artifizialean espezializatutako enpresa donostiarrak datorren urtean 60 pertsona kontratatzea aurreikusten du. 4 langile zituztela abiatu zuten konpainia 2019an, eta 260 izango dira laster.
Pentsiodunak Euskadiko hiriburuetan manifestatu dira gutxieneko pentsioak LGSarekin parekatzea eskatzeko
Ehunka pertsonak bat egin dute Gasteizen eta Donostian Euskal Herriko Pentsiodunen Mugimenduak deitutako manifestazioekin; hain zuzen ere, osteguneko Legebiltzarreko bozketan presioa egiteko, gutxieneko pentsioak Lanbide arteko Gutxieneko Soldatarekin (LGS) parekatzea eskatzeko.