Bridgestoneko CCOOk, UGTk eta BuBk astelehenean sinatuko dute erregulazio txostena, 420 kaleratze onartuta

Bridestoneko CCOO, UGT eta BuB sindikatuek astelehenean sinatuko dute, enplegu-erregulazioko espedientearen (EEE) kontsulta epeko azken bileran, enpresak egindako azken proposamena. Basauriko eta Puente San Migueleko (Kantabria) lantegietan guztira 420 langile kaleratuko dituzte, txosten horren arabera, eta ekainaren 23tik aurrera aplikatuko da. ELAk eta SITBk uko egin diote sinatzeari, ez dituztelako baja traumatikoak onartzen. 

Bridgestone multinazionalaren Basauriko eta Puente San Migueleko langileek erreferendun bidez onartu zuten EEErako enpresaren azken proposamena, aldeko 805 boto (% 69,4), kontrako 322 (% 27,8), 29 boto zuri eta 3 baliogabe emanda. Bizkaiko lantokiko 232 langileri eta Kantabriako 188ri eragingo die erregulazioko espedienteak. 

Astelehenean erantzun behar diote sindikatuek enpresaren azken proposamen horri. CCOOk, UGTk eta BuBk erreferendumean ateratakoa errespetatuko zutela hitz eman zuten. Behin langileek onartzearen alde eginda, beraz, akordioa onartuko dute. Hortik aurrera, enpresak Administrazioari igorriko dio dokumentazioa, eta hark 15 egunen buruan ebatzi beharko du prozesuak legezko parametroak betetzen dituen, Roberto Corral Basauriko langileen batzordeko presidenteak azaldu duenez. 

Bien bitartean, aurre-erretiroak edo borondatezko bajak eskatu nahi dituzten langileei enpresari horren berri emateko epea zabalduko du lantegiak. Horrela, ekainaren 23tik aurrera aplikatuko litzateke enplegu-erregulazioko espedientea. 

Sindikatuek esku artean dituzten datuen arabera, 100 langile inguru dira Basauriko lantegian aurre-jubilazioa eskatzeko adinean daudenak, eta 40 bat Puente San Miguelen. Gainera, asko dira borondatezko baja hartzeko interesa dutenak. Lan egindako urte bakoitzeko 45 eguneko kalteordaina jasotzeaz gain (hileko mugarik gabe), 30.000 euro jasoko dituzte. 

Horrela, sindikatuen iritziz, nabarmen jaitsiko da kaleratze traumatikoen kopurua. Aurre-jubilazioak kenduta, 280 langile kaleratuko dituzte, eta pizgarridun bajak hartuko dituzte batzuek, indemnizazioa jaso nahi dutelako edo beste enpresa batean lana berehala lortzeko aukera ikusten dutelako. 

Baja hartzeko bete beharreko baldintzak gorabehera, enplegu-erregulazioko espedienteak eragingo dien arloetako langileek pizgarridun bajak hartzeko eta aparteko 30.000 euroak jasotzeko aukera izango dute (enplegu-erregulazioko espedientea aplikatuta kaleratuko balituzte, ez lukete jasoko). "Enpresak azken finean hauxe esan du: lanpostu batzuk txostenean sartzen ditut eta beste batzuk ez. Orduan, txostenean sartutako postua dutenek aukera dezakete borondatezko baja, eskatzeko, nahiago dutelako 30.000 euro gehiago poltsikoratu", azaldu du Basauriko batzordeko presidenteak.

Gaineratu duenez, borondatezko bajen kasuan "aniztasuna" egongo da, horretarako arrazoiei dagokienez: "Batzuek benetan hala nahi dutelako hartuko dute, familiako ekonomia konpontzeko aukera hori probestu eta lanera beste norabait joango direlako, eta beste batzuek, kaleratuak izateko arriskuan egongo direlako, eta, horri aurre hartuta, nahiago izango dutelako 30.000 euro horiek jaso". 

Behin grebak bertan behera utzita, akordioa sinatu ondoren, ekoizpena egokituko da, eta ekainaren 23tik aurrera dauden bajen arabera moldatu beharko da, gelditzen diren langileak postuetan berrantolatu eta arlo batetik beste batera aldatzen diren langileei formakuntza emateaz gain. 

Mikel Torres bigarren lehendakariorde eta Ekonomia, Lan eta Enplegu sailburuak modu positiboan baloratu du Bridgestoneko langileen erabakia, errespetatzeko eskatu du, eta Eusko Jaurlaritzak langileak babestuko dituela erantsi du.