Zaborren tasa berria onartuta eta gainerako zergak izoztuta, Bilbon

Bilboko Udalak 2026rako Ordenantza Fiskalak onartu ditu ostegun honetan, EAJ eta PSE-EEren aldeko botoekin eta oposizioko talde guztien gaitzespenarekin. Tasa berriek udal zerga guztiak izoztea eta, lehen aldiz, hiri hondakinen tasa berri bat ezartzea aurreikusten dute. Europako araudiak tasa hori ezartzea derrigorrezkotzat jotzen du, eta Ur Partzuergoak kudeatzen duen zaborren egungo tasa ordeztuko du. 2026ko urtarrilean jarriko da indarrean.

Marta Ajuria Ogasun zinegotziak azaldu duenez, tasa berriak Europako printzipioak bete behar ditu: "ezin da defizitarioa izan, zerbitzuaren benetako kostua islatu behar du; kutsatzen duenak ordaindu behar du". Zerbitzuaren kostua, 2026an, 36 milioi eurokoa izango da, eta gaur egun 31,7 milioi eurokoa da.

Zerga berriak etxebizitza eta lokal guztiei eragingo die, bizitegikoak izan zein ez. Kuota bi zatitan banatuko da: oinarrizko osagai bat (% 40), higiezinaren katastro-balioaren arabera kalkulatua, eta osagai espezifiko bat (% 60), etxebizitzetan erroldatutako pertsona kopuruaren edo bizitegikoak ez diren higiezinetako jarduera motaren eta azaleraren araberakoa.

Oposizioak ordenantza kritikatu du. Alderdi Popularrak salatu du tasa berriak % 45eko igoera ekarriko duela zaborren fakturan, eta EH Bilduk, berriz, kalkulua uraren kontsumoan oinarritzea eskatu du, adierazle bidezkoena delakoan.

Udalak baimena emango du tasa zatitzeko, hileko sei kuota berdinetan banatuta, interesik gabe, 2026ko maiatzaren 31 baino lehen eskatuz gero, eta 2027an Nahierako Ordainketaren sisteman sartuko da.

Gainera, hobariak ezarriko zaizkie hondakin organikoen banakako bilketa sisteman parte hartzen dutenei. 2026an, urtarrilaren 1a baino lehen alta ematen dutenek % 10eko deskontua jasoko dute osagai espezifikoan, eta ehuneko hori % 20ra igoko da 2027an edukiontzi marroiak erabi ohi dituztela egiaztatzen dutenentzat. 

Tasa berriarekin batera, 2026rako gainerako udal zergak izoztea onartu du osoko bilkurak, zenbait aldaketa tekniko eginda zergetan, hala nola ibilgailuen zergan, gainbalioan eta ordenantza fiskal orokorrean. 

Ondasun higiezinen gaineko zergaren kasuan, etxebizitza hutsengatiko errekarguaren salbuespena I. graduko mendekotasun kasuetara zabaldu da, eta II. eta III. mailetako kasuei gehitu zaie.