Eusko Jaurlaritzak irtenbideak eskatu ditu datorren urtean berdelaren kuota % 70 murriztu behar ez izateko

Amaia Barredo Eusko Jaurlaritzako Nekazaritza eta Arrantza sailburuak "elkartasuna eta koherentzia" eskatu dizkio Europar Batasuneko Arrantza Kontseiluari, datorren urteko berdelaren kuota % 70 murriztu behar ez izateko. 

Europar Batasuneko Arrantza ministroek datorren urteko arrantza kuotak negoziatzen jarraitzen dute Bruselan, bigarren egunez jarraian. 

Bruselan egindako adierazpenetan Barredok azaldu duenez,  Barredok adierazi du iparraldeko herrialdeekin (Faroe Uharteak, Groenlandia, Islandia, Norvegia eta Erresuma Batua) akordiorik lortzen ez bada, murrizketa horri "alternatiba bat" bilatu beharko zaio.. Horren ustez, murrizketa horrek  "arriskuan" jarriko luke baxurako arrantzaren "errentagarritasuna".

“Onartezina da estatu batzuk inolako kuotarik gabe arrantzan aritzea, eta beste batzuek ahalegin handia egin behar izatea, % 70eko murrizketarekin”, azpimarratu du Barredok. 

Atlantikoan eta Mediterraneoan kezka ezberdinak badituzte ere, aldi berean negoziatzen ari dira. 

Atlantikoari dagokionez, berdelaren kuota da akordioa lortzeko oztopo nagusia. Izan ere., Bruselak % 70 murriztu nahi du kuota. 

Dena den, Mediterraneoko arrantza egunen eztabaidak gaina hartu du, Europako hegoaldeko estatuek onartezintzat jo dutelako urteko lanegunak 27tik 9,7ra murrizteko Europako Batzordeak egindako proposamena. 

Iturri diplomatikoek azaldu dutenez, Espainia, Frantzia eta Italia bat egin eta frontea osatu nahian ari dira lanegun gehiago onar ditzaten presioa egiteko. 

Arrantza ministroen arteko bilerak larunbatera arte luzatu daitezke. Helburua 2026rako Atlantikoko eta Mediterraneoko arrantza kuotak adostea da, baina Atlantikoaren kasuan 2027 eta 2028koak ere adostuko dira.