Petronorren Muskizko findegiko unitate guztiak geratu dituzte hornidura elektrikorik ez dagoelako

Petronorrek Muskizko findegiko unitate guztiak gelditu ditu igande arratsaldean, 17:15ean, hornidura elektrikorik ez zegoelako.

Ohar baten bidez jakinarazi dutenez, segurtasun-neurri guztiak aktibatu dituzte automatikoki, eta ke beltza atera da hiru zuzietatik.

Halaber, lantegia gelditu dute "segurtasun-baldintzak ziurtatuz, eta larrialdi sistema guztiak behar bezala funtzionatzen ari dira".

Petronorrek azaldu duenez, zuziak "ezinbestekoak diren segurtasun-gailuak" dira industria-instalazioetan, egoera jakin batzuetan presioa askatzeko. Zuziak etengabe monitorizatzen dira, emariak, tenperatura eta sugarraren itxura neurtzen dituzte, eta elementu guztiak aldiro-aldiro ikuskatzen dira. Horiek edozein gorabeheraren ondorioz sortutako gasak erretzeko eginkizuna dute, atmosferara isurtzea saihesteko.

Enpresaren arabera, zuziak "nahiko deigarriak izan daitezke batzuetan, ke-laino beltza botaz, baina ez da kezkatzeko arrazoia. Aitzitik, ondo funtzionatzen ari direla eta instalatutako funtzioa betetzen dutela frogatzen du".