Zumarragako Ospitaleko medikuek ez dute arratsaldetan aparteko ordurik egingo apirilaren 27tik aurrera

"Presio-neurri" berri bat da, Medicos Unidos por sus Derechos (MUD) erakundeak sustatua, eta medikuek hilero egiten duten grebari gehitzen zaio, esparru-estatutu bat lortzeko eta, aldi berean, autonomia-erkidegoek jada ezar ditzaketen hobekuntzak egiteko helburuarekin.

osakidetza — Zumarragako Ospitalea. Argazkia: Osakidetza

Agencias | EITB

2026/04/19 - 19:45

Azken eguneratzea

2026/04/19 - 19:45

Zumarragako Ospitaleko (Gipuzkoa) medikuek erabaki dute ez dutela apirilaren 27tik aurrera arratsaldetan aparteko ordurik egingo. Horrela, bat egin dute Donostiako eta Txagorritxuko ospitaleetako sendagileek hartutako neurriarekin astelehenetik aurrera, protesta gisa, ez baitute arratsaldetan ordu estrarik sartuko.

Maiatzean, Bizkaiko ospitaleetako medikuak batuko dira protesta horretara; zehazki, Gurutzetako, Basurtuko, San Eloyko eta Urdulizko sendagileak.

"Presio-neurri" berri bat da, protesta deitu duen erakundeak azaldu duenez, medikuak hilero egiten ari diren greba indartze aldera-edo.

Osakidetzak jaso du dagoeneko Zumarragako Ospitaleak hartutako erabakiaren berri. Hartara, aipatutako hiru ospitaleetan, sendagileek ez dute aurrerantzean (arratsaldeko txandan) borondatezko aparteko ordurik egingo.