Zaballako sei funtzionariok kea arnasteagatik izandako lesioak "prebentzio gabezi larrien" ondorio izan ziren

Lan Ikuskaritzak ebatzi du Zaballako espetxean, iazko abenduan, sei funtzionariok kea arnasteagatik izandako lesioen atzean "Eusko Jaurlaritzari egotz dakizkiokeen prebentzio-gabezia larriak" daudela. 

ELAk eman du erabakiaren berri, arratsaldean zabaldutako ohar batean. Sindikatu horrek eraman zuen gaia Lan Ikuskaritzara, eta orain iritsi da behin betiko txostena. Horren arabera, "kausa-ondorio erlazio argia" dago "Administrazioaren omisioen eta lan-istripuaren artean". 

"Dokumentuak zehazten du ziega bateko suteak eragindako larrialdiko esku-hartzea parte hartu zuten langileek ez zutela halako egoera larri bati aurre egiteko beharrezko prestakuntza, informazio eta jarraibiderik. Gainera, agintariek egiaztatu zuten istripua gertatu zen egunean suteak detektatzeko soinu-sistema erabat deskonektatuta zegoela", dio oharrak. 

Sindikatuak salatu du "behin eta berriz errepikatzen den egoera" dela honakoa, eta esan du ebazpenak agerian uzten duela "prebentziozko kudeaketa-eredu bat" dagoela,  "langileen eta erabiltzaileen bizitza etengabe arriskuan jartzen duena". 

Prebentzio-baliabidetan "premiazko inbertsioa" eskatu du ELAk, eta Eusko Jaurlaritzari ohartarazi dio berehala jarduten ez badu, lantokietan mobilizazioetara joko duela eta erantzukizun politikoak argitzeko bide judiziala abiaraziko duela.