Azpeitiko ustezko hiltzaileari 11 urteko espetxe zigorra ezarri zioten 2009an, droga trafikoagatik

30 urteko taxilariaren ustezko hiltzailearen bila jarraitzen dute ostegun honetan Azpeitian. Horretarako, Ertzaintzak herriko hainbat saltokiri kamerek grabatutako kaleko irudiak eskatu dizkie. Tiroketaren egileak krimenaren ondoren egindako urratsen inguruko informazioa atera nahi lukete irudiotatik. 

Bestalde, Eusko Jaurlaritzako Segurtasun Sailak gaur baieztatu du hilketaren susmagarri nagusiak aurrekari penalak dituela. Besteak beste, Gipuzkoako Lurralde Auzitegiak 11 urteko espetxe zigorra ezarri zion 2009an, droga trafikoarekin lotutako auzi batean. 

Ertzaintzak susmagarriaren etxebizitza eta beste bi higiezin miatu zituen atzo Azpeitian, eta Azkoitian ere etxebizitza bat arakatu zuten, ustezko hiltzailearen amarena. 

Operazioa Azpeitiko Landeta auzoan egin zen, bereziki, baina beste auzo batzuetara ere zabaldu zen. Guztira, sei patruilek hartu zuten parte, Ertzaintzako eta Udaltzaingoko agenteekin.  

Gertakaria astearte arratsaldean izan zen, Artzubia hiribiko biribilgune batean. Gizon bat hil zuten, su-arma batekin tiro eginda. 

Lekukoen arabera, susmagarriak biktimaren autoa jo zuen, eta hura ibilgailutik jaitsi zenean, erasotzaileak hainbat tiro jaurti zizkion. Horietako batek, buruan jo zuen. Ondoren, egileak auto gris batean ihes egin zuen. 

Biktima 30 urteko gazte bat zen, lanbidez taxilaria, eta herrian oso ezaguna DJ gisa egindako lanagatik.