Arartekoak hezkuntza aldarrikatu du indarkeria matxista amaitzeko
Iñigo Lamarca Arartekoak gazteen baloreen hezkuntza lantzeko deia egin du, ideia matxistak desagerrarazteko eta emakumeen kontrako indarkeriari aurre egiteko.
Arartekoak Emakumeenganako Indarkeriaren Kontrako Nazioarteko Egunaren harira kaleratu duen adierazpenean esan duenez, "emakumeen eta gizonen arteko berdintasuna oinarrizko printzipioa eta balorea da gizartean, eta barruraino sartu behar da ideia hori emakumeen kontrako indarkeria ez betikotzeko".
Era berean, Arartekoak dei egin die herritarrei eta erakundeei "indarkeria matxista salatu dezaten, bakoitzak bere neurrian eta dituen baliabideekin".
Nafarroak indarkeria matxista mota "guztiak" gaitzetsi ditu
Nafarroako Gobernuak, bere aldetik, gaitzespen "irmoa" agertu du emakumeen kontrako indarkeria mota guztien aurrean, "gizartean dugun genero diskriminazio eta bereizketaren adierazpen larriena" delako.
Era berean, Teresa Nagore Nafarroako Familia eta Berdintasun Institutuko zuzendariak agiri baten bidez azaldu duenez, Foru Gobernuak indarkeria matxista "desagerrarazteko" lan egingo du. Horren harira, gazteen arteko indarkeria kasuei arreta berezia jarriko diete, eta 'Ez zait berdin' kanpaina sortu dute herritarrak arazo horren larritasunaz jabetzeko.
Bestalde, Iruñeko Udalak Azaroaren 25a kalea inauguratu du gaur Ermitagaña auzoan, emakumeen kontrako indarkeriaren biktimen omenez.
Bizkaian gazteak dira helburua
Bizkaiko Foru Aldundiak emakumeen kontrako indarkeria desagerrarazteko lanean lidergoa har dezatela eskatu die gazteei.
Imanol Pradales Bizkaiko Ekonomia Sustatzeko diputatuak azaldu duenez, "Foru Aldundia etengabe ari da lanean pertsonen kontrako eta giza eskubideen kontrako jarrerak, baloreak eta jokabideak desagerrarazteko".
Lan horretan lidergoa hartzeko eta Bizkaiko gizartean emakumeen eta gizonen arteko berdintasuna lortzeko, "elkartasuna eta konpromisoa" erakusteko eskatu die Pradalesek gazteei.
Bilboko Udalak, bere aldetik, erakunde guztiekin, elkarteekin eta herritarrekin "lanean jarraitzeko" konpromisoa hartu du, "gizartearen gaitz honi" aurre egiteko. Horretarako, berdintasunaren aldeko udal politika "aktiboak, parte-hartzaileak eta koordinatuak" sustatuko ditu.
Donostiak "puntu kritikoak" desagerraraziko ditu
Donostiako Udalak, berriz, indarkeria matxista kasuak gertatzeko arriskua duten "puntu kritikoak" desagerrarazteko konpromisoa agertu du gaur.
EUDEL
Azaroaren 25a dela eta, EUDELek adierazpen instituzional baten eredua bidali du euskal udal guztietara, Beldur Barik ekimenaren eta Berdinsarea/Berdintasunaren Aldeko Euskadiko Udalen Sarearen esparruan prestatutakoa.
EUDEL elkartetik gogorarazi dutenez, Beldur Barik Topaketa egingo dute azaroaren 30ean, larunbatean, Basaurin.
Puntu lilak Euskal Herri osoan
Azaroaren 25a Emakumeenganako Indarkeriaren Kontrako Nazioarteko Eguna da, eta, indarkeria mota hori arbuiatzeko asmoz, mundu osoko hainbat erakundek, elkartek, agintarik... makina bat ekitaldi eta mobilizazio deitu dituzte.
Puntu lila, emakumeenganako indarkeriaren aurkako sinboloa, Euskal Herri osoko herri, hiri, eraikin eta lagunek jarri dute ikusgai.
Eusko Legebiltzarrak puntu lila jarri du eraikinaren aurrealdean, Gasteizen, indarkeria hori arbuiatzeko.
Arabako Foru Aldundiko Gobernuaren Kontseiluak elkarretaratze isila egin du Aldundiaren Jauregiko eskaileretan.
ELA eta Euskadiko CCOO sindikatuek mobilizazioak egin dituzte. ELA Bilboko Arriaga Plazan izan da, 11:30ean. CCOOk margoz betetako puxikak jaurti ditu Cásate y se sumisa liburuaren azalaren kontra, Pio Baroja Plazan.
Euskal Herriko Bilgune Feministak hiriburu guztietan deitu ditu mobilizazioak. Bilbon, esaterako, manifestazioa abiatu dute 19:30ean Arriaga Plazatik, 'Ez dut ausart sentitu nahi, aske sentitu nahi dut. Feminismoak aske egiten gaitu' lelopean.
EiTB, ekimenekin bat
EiTBk bat egin du Emakumeenganako Indarkeriaren Kontrako Nazioarteko Egunaren aldarrikapenekin.
Radio Euskadin eta Euskadi Irratian, adibidez, programazio berezia egin dute horri lotuta. Besteak beste, tratu txarrak pairatu dituzten biktimen adierazpenak jaso dituzte.
Horrez gain, ETBko kateetan eta eitb.com-en ikur bereziak egon dira ikusgai.
Zure interesekoa izan daiteke
Hiru pertsona artatu dituzte Usurbilen, sute batean kea arnasteagatik, eta beste bat Errenterian
Usurbile, hiru pertsonak tokian bertan artatu dituzte, baina Errenterian, Donostia Ospitalera eraman behar izan dute emakume bat. Barañaingo supermerkatu batean ere sutea izan da larunbat honetan baina ez da inor zauritu.
Manteroen kontrako "poliziaren esku-hartze bortitza" salatu dute dozenaka lagunek Bilbon
Mbolo Moye Doole eta Manteroekin bat! plataformek deituta, ostegunean Ertzaintza eta Udaltzaingoa manteroen aurka indarkeriaz aritu zirela salatu dute. Horien esanetan, "ez da gertaera isolatua izan", hilero jazotzen baitira halakoak.
Euskaraz bizitzeko eskubidea aldarrikatu eta EHEko lau ekintzaileren aurkako epaiketa salatu dute dozenaka lagunek Baionan
Euria eta hotza egin badu ere, 200 euskaltzale batu dira protestara datorren ostegunean epaituko dituzten Euskal Herrian Euskarazeko lau kideei babesa emateko.
Adingabe bat atxilotu dute Getxon, beste gazte bati lepoan labankadak eman eta larri zauritzeagatik
Ertzaintzak jasotako testigantzen arabera, 01:00ak aldera, hiru gazte Areeta auzoko parke batean zeuden banku batean eserita, erasotzailea eurengana joan eta oldartu zitzaienean. Higu gazteek korrika alde egin zuten baina bat harrapatu eta zauritu egin zuen.
Kamioi batek A63 autobian izandako istripuak auto-ilara luzeak eragin ditu Donibane Lohizune parean
Ibilgailua irauli egin da, eta ondorioz zama galdu du. Errepidea erabat itxi dute eta 6 kilometrora arteko ilarak sortu dira, baina 19:15ean errei bat ireki dute bertan hiru orduz geldirik egon diren ibilgailuak pasatzeko. Ondoren, berriro itxi dute bidea, kamioia bertatik kendu ahal izateko.
Gizon bat atxilotu dute Errenterian beste gizon bat labanaz hiltzen saiatzea egotzita
Ertzaintzak atzo atxilotu zuen 36 urteko gizasemea, baina gertakariak hilaren 12an jazo ziren, Gipuzkoako udalerri horretako lokal batean. Biktima, 21 urtekoa, ospitaleratu egin behar izan zuten, zauri larriak baitzituen.
Osasun sailburuaren arabera, iraungitako txertoen kasuak "ESI batean edo bitan izan dira, Donostialdekoan tartean"
Alberto Martinezek ETBn egindako elkarrizketa batean azaldu duenez, pertsona batek "bere lana egin beharko lukeen modura egin ez duela ondorioztatzen bada, horren ardura hartu beharko luke, zalantzarik gabe". Sailburu gisa, ahal den neurrian, horrelako akatsak ez direla berriro jazoko bermatu behar duela nabarmendu du, hori baita bere "ardura".
Euskal eskola publikoen "itxierak eta bat-egiteak" itunpeko ikastetxeei "artifizialki eusteko" direla salatu du Sumarrek
Sumar Mugimenduak, Ezker Anitza-IUk eta Berdeak Equok "Hezkuntza publikoaren aldeko frontea" ekitaldia egin dute larunbat honetan Santurtzin, EAEko hezkuntza publikoaren egoera aztertzeko.
Osakidetzak iaz jarritako 168.000 txerto berrikusiko ditu, balizko gorabeheren bila
Gripeari eta COVID-19ari aurre egitekoak izan ezik (seguru dakite horiek ez zeudela iraungita), 2025ean inokulatutako guztiak aztertuko dituzte, badaezpada.
Elurrak eta izotzak zirkulazioa zaildu dute zenbait mendatetan larunbat honetan
Bernedoko mendatea itxita dago, errepidean elurra pilatu baita. Azazetan, Kurtzetan, Herreran edo Urduñako mendatean arreta handiz ibili behar da, eta Opakuan eta Izaban kateak behar dira.