Ehunka lagunek Andina Pereiraren hilketa gaitzetsi dute Mungian

Andina Pereiraren hilketa matxista gogor gaitzetsi dute Mungiako bizilagunek eta erakundeek. Biktimak 35 urte zituen.

Mungiako Udalak, biktimaren lagunek eta erakundeetako ordezkariek egindako deialdiari erantzun diote ehunka pertsonek. Eusko Jaurlaritzak, Bizkaiko Aldundiak, Eudelek eta Emakundek elkarretaratzeari babesa eman diote.

Elkarretaratzea 19:00etan hasi da udaletxearen aurrean. Protestak 15 minutuko iraupena izan du. Elkarretaratze isila izan behar zuen, baina manifestari batzuek "Justizia" eskatzeko oihu egin dute, eta baita amorrua adierazteko ere. Elkarretaratzea "Mungiak indarkeriari, ez" lelopean egin dute.

Besteak beste, Josu Erkoreka Eusko Jaurlaritzako bozeramaileak, Jose Luis Bilbao Bizkaiko ahaldun nagusiak eta Ignacio Erice Espainiako Gobernuko ordezkariordeak parte hartu dute.

Era berean, Izaskun Landaida Emakundeko zuzendaria, Nerea Llanos Euskadiko PPren idazkari nagusia, Idoia Mendia PSEko bozeramailea, Diana Urrea EH Bilduko legebiltzarkidea eta Irune Soto koalizio bereko bozeramailea Bizkaiko Batzar Nagusietan, Mungian izan dira.

Andinaren senitartekoei eta lagunei elkartasuna adierazi die Landaidak, eta hilketa "erabat errefusatu" du, "gizonen eta emakumeen arteko desberdintasunaren adierazpen bortitzena delako".

Brasildar ugari

Elkarretaratzean brasildar askok parte hartu dute. Parte-hartzaileek biktimaren argazkiak erakutsi dituzte, "Justizia Andinarentzat", "Ez dago eskubiderik, ez bigarren baten zain egon" edo "Ez zaitugu sekula ahaztuko" mezuekin.

Dolu ikur bezala "M" formako eskultura zapi lila batekin estali eta dolu-xingola beltza jarri dio Mungiako Udalak. Era berean, Ikurriña eta Mungiako bandera haga erdia jarri dituzte.

Gainera, goizean inguruko beste udal batzuek (Sopela, Ondarroa...) hilketa gaitzetsi eta elkarretaratzeak deitu dituzte. Berdintasunaren alde lan egiteko eskatu diete guztiek herritarrei.

Elkarretaratzea Mungian. Argazkia: EiTB

Atxilotua, espetxean

Epaileak 14:30ean ustezko hiltzailea Basauriko (Bizkaia) kartzelan sartzea agindu du, Segurtasun Sailak jakitera eman duenez.

Gizonezkoa 35 urtekoa eta Zamudioko bizilaguna da, eta aurrekariak ditu aurreko bikotekide bati ere tratu txarrak emateagatik. Andinak, baina, ez zuen salaketarik jarri horren aurka, EFEk jakinarazi duenez.

Akusazio partikularra

Ezohiko eta premiazko saio batean onartutako adierazpen instituzionalean, Mungiako Udalak prozesu judizialean akusazio partikular gisa aurkeztea erabaki du, Andinaren senideen eskubideak bermatzeko eta Mungiako herritarren izenean justizia eskatzeko.

Adierazpenean, Udalak "gaitzespen irmoa" agertu du Andinaren "heriotza bortitz eta bidegabearen" aurrean. Halaber, "elkartasuna eta gertutasuna" adierazi die seme-alabei, senideei eta lagunei.

Biktimaren seme-alabak

10 eta 14 urteko bi seme-alabak Bizkaiko Foru Aldundiaren eskuetan geratu dira.

Amanda eta Marcos umezurtz geratu dira. Umeak dira, hain zuzen ere, gure gizartearen gaitz honetako biktima ahaztuak.

Bizkaiko Aldundiko zerbitzu sozialak egin dira seme-alaben kargu,  Brasildik senideak iristeko zain, haietaz arduratzeko.

Gorpua aberriratzeko diru-bilketa

Bestalde, Andina Pereiraren senitartekoek dirua biltzeko kanpaina hasi dute gaur. Gorpua aberriratzeko dirua behar dute, eta baita bi seme-alabak Brasilera eramateko ere.

Gorpua eta bi seme-alabak aberriratzeko 10.800 bat euro behar dituztela azaldu du Fabio Brito biktimaren anaiak.

"Kontsulatuak laguntzea ez da gauza segurua eta ziurtasuna behar dugu. Lehenbailehen ekarri behar dugu, hemen ikusi eta gure alboan lur emateko", adierazi du Britok telefonoz.