Vianako bi adingabe inputatu dituzte 15 urteko baten heriotzagatik

Antza denez, perdigoi batek 15 urteko mutil bat hil zuen ostegun goizaldean, Vianan (Nafarroa). Adingabeen Fiskaltzak ikerbidea hasi, eta herriko bi adingabe inputatu ditu heriotzagatik.

Radio Euskadik jakitera eman duenez, mutila etxera zihoan gurasoekin batera 01:15 aldera, baina etxabe batean gelditu ziren Juan Cruz kalean. Dirudienez, biktimaren lagunak bertan zeuden, karabina batekin jolasten.

Lokalaren atea ireki eta adingabea lurrera erori zen. Autopsiak baieztatu duenez, zoritxarrez perdigoi batek bihotza eta birika zulatu zizkion. Hasieran, gurasoak ez zren konturatu.

Bihotzaren parean

100 metrora dagoen osasun-zentroan laguntza eskatu zuten gurasoek. Semeak konortea galdu zuela azaldu zuten. Aitak bere ibilgailuan eraman zuen mutila anbulatoriora, eta balinak egindako zuloa antzeman zuten osasun-langileek bihotzaren parean.

Gertakariak Viana hunkitu du, eta bertako bizilagunek minutu bateko isilunea egin dute herriko plazan. Biktimak Vianako ikastolan ikasi zuen eta orain Lapuebla de Labarcako (Araba) ikastolan ikasten ari zen. Heriotza istripu bat izan dela azaldu du Vianako Udalak, eta gertakariaz hitz egiteko orduan zuhurtzia eskatu du.

Vianan, herriko jaiak ospatzen ari da, baina ostiral honetan egitarauko ekitaldiak bertan behera utziko dituzte, kalejira eta zekorketa esaterako. Hileta-elizkizuna 19:00etan egingo dute, Santa Maria Elizan.