Azaroan emango du Nafarroako Auzitegiak 'Manada' auziaren kontrako helegiteen epaia

Azaroaren 7an erabakiko du Nafarroako Auzitegi Nagusiko Zigor-Arloko Salak 'Manada' auziko bost kideen epaiaren aurkako helegiteen inguruan. 2016ko sanferminetan neska bati sexu-abusuak egiteagatik 9 urteko espetxe-zigorra jarri zien Nafarroako Auzitegiak bost kide horiei, duela hilabete batzuk.

Orain, ostera, epai horren aurka jasotako helegiteen gaineko erabakia hartu beharko dute Zigor-Arloko Salako epaileek. Behin erabakia hartuta, hilabete inguru itxaron beharko dute bi aldeek epaiaren berri jasotzeko.

Bien bitartean, ahozko bigarren epaiketa bat egitea baztertu dute, salatzailearen, Iruñeko Udalaren eta zigortutako lau kideren defentsaren eskariak atzera botata.

Ildo horretan, Auzitegi Nagusiak ez du beharrezkotzat jotzen ahozko epaiketa egitea "erabaki zuzen bat hartzeko bidean". Gainera, Arlo Penaleko Salak uste du salatzailea babesteko modu bat ere badela epaiketa ez egitea.

Era berean, sexu indarkeriaren biktimen Madrilgo zentro batean salatzaileak jasotako tratuari buruzko dokumentua gaitzetsi dute, berriro ere.

Autoaren arabera, txosten psikologiko horrek transkripzio akats bat zeukan. Hain zuzen ere, tratamendu jakin baten hasiera zehazten zuten bertan, eta datu hori ez zen zuzena.