Nafarroak Sarayren lan 'solidario eta eredugarria' saritu du Urrezko Dominarekin

Uxue Barkos Nafarroako presidenteak Nafarroako Urrezko Domina eman dio astelehen honetan SARAY Bularreko Minbiziaren Nafarroako Elkarteari, erakunde horrek "osasuna sustatzeko egiten duen lan solidario eta eredugarria" nabarmendu duelarik.

Halaber, Barkosek esan duenez, "golardo honen bitartez, lau haizeetara aldarrikatu nahi dugu, gaitasunaren berezko arazoei aurre egiten laguntzen duten beharrezko zerbitzu eta programen multzoa garatu eta finkatzeko nahiz eritasunaren ondorio fisiko, psikologiko eta sozialak gainditzeko, elkarte honek egin duen ahalegina.

Aurten, lehendabiziko aldiz, herritarrek parte hartzeko prozesua abiarazi da, gizartea hobetzen, balio demokratikoak indartzen edota Foru Komunitatearen kanpoko irudia bultzatzen laguntzeagatik nabarmendu diren pertsonak, erakundeak, entitateak eta kolektiboak aldarrikatzea xede duen Nafarroako golardo gorenerako hautagaitzak aurkezteko.

Barkosek bertaratutakoen aurrean hitz egin du, 1996az geroztik bularreko minbizia duten pertsonei eta horien senitartekoei "laguntza integrala, pertsonala eta indibidualizatua" eskaintzen dien elkarte horren laudoriotan.

"Horregatik, nahitaezkoa da Sarayk bularreko minbizia diagnostikatua duten emakumeei eskaintzen dien laguntza: berotasuna eta konfiantza ematen baitizkie zalantza eta beldurraren aurrean, eta beharrezko animoa, adorea eta irmotasuna ematen baitizkie suspertze prozesuari aurre egin eta normaltasunera gogoz beterik itzuli ahal izateko", gaineratu du.

Bestalde, Ana Sarasa Sarayko presidenteak eskerrak eman dizkie Nafarroako Gobernuari eta "Nafarroako Urrezko Domina gaur Sarayren bularrean jartzea posible egin dutenei". Ildo horretan, "duela hogeita bi urtetik hona, bular birtual eta kolektibo honetan biltzen dira nahi ez diren tumore horiek kaltetutako pertsona guztiak, batzuk iragankorrak eta besteak ez, bizitza aldatu zigutenak; batzuk botatzea lortu dugu eta beste batzuk oraindik ahalegintzen ari gara. Denok gaude gaur hemen bularra bistan,… lortu genuenak, lortu nahi zutenak eta ezin izan zutenak. Guztiei jartzen diegu Domina hau, sendatu ezin den bakarra bizitzeko gogoa dela gogoratzeko", esan du.

Elkarteak 600 bazkide baino gehiago eta berrogeita hamar boluntario inguru ditu, psikologoak eta gizarte-langileak tarteko dituen talde profesionalarekin batera.