Nafarroako pobrezia tasak beheranzko joeran jarraitzen du

Pobreziaren eta berdintasunik ezaren harira Nafarroako Gobernuak egindako txostenaren arabera, Nafarroan 6.400 pertsona inguru gutxiago izan ziren 2016an pobrezia egoera larrian, % 8,4tik % 7,4ra egin baitzuen behera tasa horrek. Halaber, Nafarroako pobrezia latza tasa hori Estatukoa (% 10,2) baino hiru puntu txikiagoa izan zen, 2016koak baitira pobrezia neurtzeko jasotako azken datuak.

Bestalde, 2016ko pobrezia latza atalasea kontuan izanda, erkidegoen artean portzentaje txikiena dauka Nafarroak, eta Estatuko batezbestekotik 10 puntura dago. Hori horrela, 2015etik 2016ra joera positiboa izan zen, bi puntu murriztu baitzen tasa hori, % 7,8tik % 5,5era, eta 17.800 lagun inguru gutxiago izan ziren pobrezia latzean, Nafarroan. Hala ere, Nafarroako Biztanleriaren Errenta-estatistikaren datuak kontuan hartuz, 4.700 pertsona gutxiago izan ziren pobrezia latzean 2016an: % 16,4tik % 15,7ra jaitsi baitzen.

Miguel Laparra Nafarroako Gobernuko Eskubide Sozialen presidenteordeak Pobreziaren eta berdintasunik ezaren II. Txostenaren emaitzak ezagutzera eman ditu Iruñean, Patxi Tuñon Errealitate Sozialaren Behatokiko zuzendari orokorrarekin eta Antidio Martinez de Lizarrondo Behatokiko Zerbitzuko zuzendariarekin batera.

Ezkerretik eskumara: Patxi Tuñon, Miguel Laparra eta Antidio Martinez de Lizarrondo. Argazkia: navarra.es

Bestalde, pobrezia arrisku tasak ere behera egin zuen 2015etik 2016ra, % 23,2tik % 22,6ra behera egin baitzuen, Nafarroako Biztanleriaren Errenta-estatistikaren datuen arabera.

Pobrezia larriaren erradiografia

Adina eta sexua kontuan izanda, pobrezia erlatiboa adina handitu ahala gutxitzen dela azpimarratu behar da: 16 urtetik beherakoen % 29,3ri eta 65 urtetik gorakoen % 18ri eragiten die. Gainera, emakumezkoen artean portzentaje hori handitu egiten da: % 23,8koa da emakumeena, eta % 21,4koa, gizonezkoena. Halaber, aipatzekoa da pobrezia arriskua atzerritarren artean nafarren artean baino askoz handiago dela, % 64,1ekoa baita atzerritarren artean eta % 18,4koa da nafarren artean.