Europak berehala esku hartzeko eskatu du, COVID-19aren gorakada “kezkagarria” delako

Europako Batzordeak eta Gaixotasunak Kontrolatzeko eta Prebenitzeko Europako Zentroak (ECDC) ostegun honetan ohartarazi dutenez, egungo egoera epidemiologikoak gero eta arriskutsuagoa da kalteberenak diren taldeentzat eta osasun-langileentzat, eta, horregatik, "berehala” neurriak hartzea eskatu du, Europan kasuen gorakada "kezkagarria" gelditzeko.

"Une erabakigarrian gaude, denek erabakitasunez jokatu behar dute, eta ditugun tresnak erabili. Horrek esan nahi du estatu kide guztiek prest egon beharko luketela kontrol neurriak berehala eta une egokian hedatzeko. Gure azken aukera izan daiteke, udaberrikoa ez errepikatzeko", ohartarazi du Stella Kyriakides Osasun komisarioak.

"Estatu kide batzuek martxo amaieran baino kasu kopuru handiagoak dituzte, argi dago ez dugula krisia gainditu", esan du.

Europako osasun organismoaren arrisku azterketa berriak ohartarazi duenez, esku hartze "ez-farmazeutikoak", hala nola distantzia sozialak, higieneak edo maskarak erabiltzeak, "frogatu dute ez direla nahikoa" birusarekiko esposizioa murrizteko edo kontrolatzeko.

"Europan hautemandako COVID-19 kasuen kopuruaren igoera kezkagarria ikusten ari gara. Eskura dagoen txerto seguru eta eraginkorra izan arte, identifikazio azkarra, testak eta arrisku handiko kontaktuen berrogeialdiak dira transmisioa murrizteko neurririk eraginkorrenetako batzuk ", azpimarratu du Andrea Ammon ECDCren zuzendariak.

Hori dela eta, ECDCk "aukera" batzuk identifikatu ditu, besteak beste, osasun-sistemaren baliabideak indartzea eta bereziki arrisku-taldeetako pertsonei eta osasun-langileei zuzendutako ahaleginak areagotzea, diagnostikoak egiteko eta kasuak aztertzeko gaitasuna handitzea, norbera babesteko ekipamenduetarako eta sendagaietarako sarbidea bermatzea, eta osasun-gaitasun nahikoa bermatzea.

14 eguneko berrogeialdia

Testuinguru horretan, ECDCk oro har hamalau eguneko berrogeialdiei eustea gomendatu du SARS-CoV-2arekin kutsatutako jendearekin harremana izan duten pertsonentzat. Europako osasun-agintariek adierazi dute esposizioaren ondorengo hamar egunera murriztu daitekeela aldi hori, baldin eta une horretan PCR proba batean negatibo bat lortzen bada.

Espainiako Estatuaren egoera ez dute aipatu nahi izan

Espainiako Estatuaren egoerari buruzko txosten berriaren edukia aurkezteko prentsaurrekoan, ECDCko zuzendariak saihestu egin du hura baloratzea eta kutsatzeen hazkundeari aurre egiteko neurriei buruz hitz egitea, erakundeak "normalean ez duelako beste herrialde batzuek egiten dutena komentatzen”.