Haize gogorrak hainbat arazo eragin ditu Euskal Herrian

Azken orduotan Euskal Herria astintzen ari den haize gogorrak hamaika arazo eragin ditu han eta hemen: errepideetan, trenbide sarean eta argindar zerbitzuan, besteak beste. Han hemenka kalte materialak ere izan dira. Esaterako, haizeak kultur etxeko teilatua eraman du Orendainen eta kalteak eragin ditu herriko frontoian.

Euskal Autonomia Erkidegoan (EAE) larrialdi zerbitzuek 1.000 intzidentzia baino gehiago zenbatu dituzte. Nafarroan, 100 esku-hartze baino gehiago egin dituzte. Ipar Euskal Herrian, ostera, 12.500 etxebizitza daude argindarrik gabe.

Haize bolada gogorrak neurtu dira han eta hemen: Iratin, Zuberoan, (216 km/h), Aralarren (197 km/h), Oiz mendian (144,5 km/h), Donostiako Santa Clara uhartean (112 km/h), Zaldiaranen (126 km/h), Zarautzen (119 km/h), Mallabian (122 km/h), Iurretan (121 km/h) eta Deustun (94 km/h).

Haizeari dagokion alerta laranja 03:00etan amaitu da Euskal Autonomia Erkidegoan (EAE) eta 08:00etan, ostera, Nafarroan.

Haizeak Orendaingo Kultur Etxeko teilatua eta azken solairua eraman ditu

Honela gelditu da Orendaingo Kultur Etxea. Argazkia: EiTB

Azken orduetan izandako haize-ufada bortitzek kultur etxeko azken solairua eta teilatua eraman dute, eta, ondorioz, kanpotik ikus daitezke liburutegiko apalak eta liburuak.

Gipuzkoako suhiltzaileek azaldu dutenez, eraikina hesitu egin dute, kristalak zintzilik geratu direlako eta oinezkoentzat arriskutsuak zirelako. Hala ere, ez da inor zauritu. 

Antza denez, haizeak eraikineko hirugarren solairua estaltzen zuen kristala apurtu du, eta "kandela efektua" egin eta solairu osoa eraman du.

Handik gertu dagoen baserri bat ere kaltetu du haizeak kultur etxetik eramandako materialak.

Era berean, haizeak arrakala handia ireki du frontoiaren sabaian.

Orendain. Argazkia: Euskadi Irratia

Larrialdi zerbitzuek 1.000 intzidentzia baino gehiago zenbatu dituzte EAEn

SOS Deiak zerbitzuan 1.044 intzidentzia kudeatu dituzte astearte arratsaldeko hiruretatik asteazken goizeko seiak arte, haize gogorrak eragindako kalteengatik.

Gipuzkoan zenbatu dituzte intzidentzia gehien (526), Bizkaiaren (357) eta Arabaren (161) aurretik. Kasu gehienetan, errepidera eroritako zuhaitzen edota haizeak mugitutako edukiontzien berri emateko jo dute larrialdi zerbitzuetara.

Zuhaitza errepidera erorita Mallabian. Argazkia: Zeberioko Udala

Halaber, intzidentzia gehienak, 689 guztira, 15:00etatik gauerdira bitartean jazo dira. Gauerditik aurrera, arazo gutxiago erregistratu dituzte.

Bestalde, denboraleak argirik gabe utzi ditu Aia, Ermua, Orendain, Zaldibar eta Zeberio.

Hego haize bortitzak kalte materialak eragin ditu Donostian, zuhaitzak edo fatxadetako elementuak erori direlako. Guztira, 58 esku-hartze izan dira bart hasi eta gaur goizera arte, zuhaitzak eta adarrak erortzeagatik, obrako edo fatxadako elementuak erortzeagatik edo edukiontziak lekualdatzeagatik.

Haizearen ondorioak Nafarroan

Larrialdietako zerbitzuek eta poliziek 100 esku-hartze baino gehiago egin behar izan dituzte bart, azken orduetan Nafarroan izan den haize bortitzaren ondorioz; besteak beste, bost kamioi irauli dira eta zuhaitzak eta adarrak erori dira errepidera.

Nafarroako Gobernuak jakitera eman duenez, SOS Nafarroak 67 gorabeheraren berri izan du 05:00ak arte, eta suhiltzaileak, Foruzaingoa, udaltzainak, Guardia Zibila eta errepideen mantenuaz arduratzen diren langileak aritu dira eragozpenak konpontzeko lanean.

Guztira, ehundik gora intzidentzia izango zirela adierazi dute Nafarroako Gobernutik, haizearen indarra ez baita 08:00ak arte baretu.

Hala, haize bortitzaren eraginez lau kamioi irauli dira N-121 errepidean (Iruñea-Tutera) izandako bi istriputan. Lehenengoa 22:02an gertatu da, Beriainen. Iruñerako noranzkoan zihoazen bi kamioi irauli egin dira, errepidearen ezkerraldea oztopatuz. 

Bigarren istripua 22:26an izan da, Tiebasen. Bi kamioi erdi iraulita gelditu dira eta gidariek osasun laguntza behar izan dute. Azkenik, beste kamioi bat irauli da A-12 autobidean, behin Erreniegako tunela igarota. Hala ere, gidaria onik atera da.

Gainera, Obanosen, Sunbillan eta Igantzin ere trafiko istipuak gertatu dira, bidera eroritako zuhaitzen aurka talka egindako trafiko-istripuak izan dira, eta zuhaitzak kendu dituzte Donezteben, Baztanen, Larragan eta Orkoienen.

Bestalde, Iruñeko Udaltzaingoak adierazi duenez, Nafarroako hiriburuan haize-ufada bortitzek kaltetutako zonaldeak garbitzeko esku hartu du Nafarroako Suhiltzaileekin batera. Batez ere, eroritako zuhaitzak eta adarrak kendu dituzte. 

Haizeak kalteak eragin ditu, bereziki, Iturrama auzoan. Izan ere, Serafin Olave, Iñigo Arista eta Eskiroz kaleetan aparkatutako autoen gainera adarrak erori dira.

Zuhaitz bat auto baten gainera erorita. Argazkia: @policiaforal_na

Gainera, Burlatan (garabi bat erortzeko arriskuan zegoen), Barañainen, Aragurenen, Noainen eta Iruñerriko beste herri batzuetan ere esku hartu dute. 

Nafarroako gainerako lekuetan, esku-hartzeak egin dituzte Ameskoabarrenan eta Lizarrako errepideetan, Baztanen, Bidasoan, Sakanan eta, neurri txikiagoan, Erdialdean eta Erriberan.

12.500 bezero argindarrik gabe, Ipar Euskal Herrian

Ipar Euskal Herrian ere gogor astindu ditu bazterrak haizeak. Iratiko etxoletan, Zuberoan, 216 km/h-ko boladak neurtu dituzte.

Haizearen ondorioz, 19.000 bezero argindarrik gabe gelditu dira Pirinio Atlantikoen Departamenduan, horietatik 12.500 Ipar Euskal Herrian.

Bestalde, hainbat tren linea etenda egon dira gaur goizean, bereziki Frantziako Tolosa inguruan, haizeak eragindako kalteen ondorioz.

Istripuak eta errepide mozketak

Trafikoari dagokionez, errepide sare nagusia zabalik dago, baina bigarren mailako errepideetan gorabehera ugari izan dira.

Hala, haize-ufada gogorren ondorioz dozenaka zuhaitz erori dira bidera eta hainbat errepide itxi dituzte. Gauzak horrela, errepidea erabat itxi dute Dima eta Arantzazu artean, Tolosa eta Bidania artean, Zarautz eta Urdaneta artean, Larrabetzu eta Galdakao artean, Asteasu eta Villabona artean, Mallabia eta Ermua artean, Amezketa eta Alegia artean eta Elgeta eta Kanpazar artean, besteak beste.

Pertsona bat arin zauritu da BI-3302 errepidean, Mallabian, gidatzen zuen autoarekin errepidera eroritako zuhaitz batekin talka eginda. Eusko Jaurlaritzako Segurtasun Sailak jakinarazi duenez, ezbeharra 06:20an gertatu da, Ermuarako noranzkoan. Zauritua Mendaroko Ospitalera eraman dute. Dena dela, haren egoera ez da larria, Segurtasun Sailaren arabera. 08:00etarako egoera bere onera itzuli da.

Nafarroan, NA-2540 errepidea itxi dute (Almandoz-Irurita) 0 eta 9 kilometroen artean zuhaitzak eta adarrak bidera erori direlako eta NA-4150 errepidea (Leitza-Goizueta-Hernani) 15. kilometroan, bidera eroritako zuhaitzak tarteko.

NA-411 errepidea eta A-15 errepidea lotzen dituen errepidea ireki dute berriro, Ostizen. 04:00etatik 09:00etara bitartean itxi egin dute, zuhaitz handi bat erori delako.

Dena dela, intzidentziaren bat duten errepideen zerrenda amaigabea da eta atera aurretik errepideen egoera kontsultatzea gomendatu dute (Trafikoa Nafarroan eta Trafikoa Euskadin).

Eragozpenak tren zerbitzuan

Euskotreneko tren zerbitzuan aldaketak izan dira Usurbil eta Elgoibar artean, trenbidera eroritako zuhaitzen ondorioz.

Oraingoz, EuskoTrenek ez du zerbitzua eten. Dena dela, erabiltzaileek autobusean egingo dute Orio eta Usurbil arteko bidea, bi norabideetan, eta Usurbil eta Elgoibar artean, Bilborako trenetan.