Curevac enpresak ekainerako espero du Europak bere txertoa onartzea

CureVac Alemaniako enpresa biofarmazeutikoak txerto berri bat lortzeko entsegu klinikoak luzatuko dituela iragarri du. Koronabirusaren aldaera berriak zabaltzen ari direla ikusita, birusaren aldaera jakin batzuen aurrean txertoa eraginkorra izango dela egiaztatu nahi dute.

Egun, hautagai den txertoa Europan eta Latinoamerikan egiten ari diren azterketa kliniko aurreratuetan ikertzen ari dira 35.000 boluntariorekin, EAEko 2.000 parte-hartzaile tartean. CureVac enpresatik baieztatu dutenez, aurtengo bigarren hiruhilekoan eskatuko dute txertoa merkaturatzerako baimena. Onespena ekainaren amaiera aldera jasotzea espero dute.

Konpainiaren arabera, entsegu klinikoak luzatuta eraginkortasunari buruzko datu adierazgarriak jaso ahalko dituzte, 12 mikrogramoko txertoa jaso zuten 60 urtetik gorako 270 pertsonako "talde garrantzitsuaren" inguruan. Ohar batean jakinarazi dutenez, euren helburua "txerto honekin biztanleria, adin-talde zaurgarrienak bereziki, birusetik eta horren mutazioetatik babestea" da.

BioDonostia eta BioCruces Bizkaia ikerketa institutuak ere hautatu zituzten entsegu klinikoan parte hartzeko. Luis Castaño BioCruces-eko zuzendariak urtarrilean Radio Euskadiko "Boulevard Informativo" albistegian azaldu zuenez, "bi txerto ditugu une honetan, baina beste batzuk ere ari dira agertzen", eta, hori dela eta, "udarako biztanleriaren % 70-80 txertatuta egotea izan behar dugu jomuga". Gaur egungo egoerak "ikerketa oso garrantzitsua dela erakutsi besterik ez du egiten", gaineratu zuen.

CureVac-en txertoak Pfizer eta Moderna konpainien txertoek duten mekanismo bera darabil, baina azken honek gordetzeko eta prestatzeko baldintza hobeak ditu eta horrek banaketa erraztuko luke.