Beste 761 kasu atzeman dira EAEn eta 121 pertsona daude ZIUetan ospitaleratuta

Koronabirusak gogor jotzen jarraitzen du Euskal Autonomia Erkidegoan (EAE). Atzo 9.442 proba diagnostiko egin ziren eta 761 positiboak izan ziren ( % 8,1). Bezperan, 920 positibo atzeman zituzten ( % 8,9).

Eusko Jaurlaritzako Osasun Sailak zabaldutako eguneroko txostenaren arabera, 98 kasu berri diagnostikatu zituzten larunbatean Araban, 368 Bizkaian, 288 Gipuzkoan eta 7 beste autonomia erkidego batzuetatik etorritako pertsonengan.

Ospitaleen egoerari dagokionez, atzo 55 pertsona ospitaleratu zituzten, eta 121 pertsona daude zainketa intentsiboetako unitateetan arrazoi horregatik, bezperan baino 6 gehiago.

Felix Zubia Donostia Ospitaleko ZIUko buruak Euskadi Irratian azaldu duenez, bere unitatean zaintzen ari diren gaixoen %50 60 urtez azpikoa da, eta estadistikek dioten moduan, 10etik 2 hil egingo direla nabarmendu du, egoeraren larritasuna azpimarratuz.

Hala, kontuz ibiltzeko deia luzatu du berriz ere, "ahalik eta kasu gutxien izan daitezen", eta kutsatuz gero, sintomei adi egoteko eskatu du: "Laugarren ego bosgarren egunean ondo egoteak ez du esan nahi ondo bukatuko denik. Kasu asko zazpigarren egunetik aurrera okeratzen dira", eta ildo horretan, sukarrari adi egoteko eskatu du, lehen egunetan joaten ez bada, sintoma txarra izan baitaiteke. "Arnas estua hasten denean gaitza oso aurreratua dago eta berehalakoan eskatu behar da laguntza, itxaron gabe" gehitu du.

Udalerriei buruzko informazioa, RO indizea eta metatutako intzidentziaren datua ez dira astelehenera arte eguneratuko.

Positibitate tasa % 11,2ra igo da Nafarroan

Nafarroan 208 koronabirus kasu zenbatu dituzte azken orduotan, bezperan baino 14 gutxiago.

Foru Erkidegoko Gobernuak kaleratu dituen behin behineko datuen arabera, orotara, 1.849 proba diagnostiko egin zituzten atzo (PCR eta test antigeno), eta horietatik % 11,2k eman zuten positibo covid-19an.