78 pertsona hil dira EAEn covid-19ak jota aurreko astean
Koronabirusak jota, 78 pertsona hil dira Euskal Autonomia Erkidegoan (EAE) aurreko astean (urtarrilaren 10etik 16ra doana), Eusko Jaurlaritzako Osasun Sailak jakinarazi duenez. 2022. urteko lehen astean baino 28 heriotza gehiago dira, eta iazko azken astean zenbatutakoen bikoitza pasatxo, 50 eta 35 izan baitziren, hurrenez hurren.
Astelehen honi dagokion buletin epidemiologikoaren arabera, 9 urtez azpiko neskato bat hil da azken astean, baina Osakidetzak ez du argitu koronabirusak eragin duen haren heriotza, edo aldez aurretik beste nolabaiteko gaixotasun larriren bat ote zuen.
Bestalde, oinarrizko erreprodukzio tasak, R0 indizeak (positibo batek kutsatzen dituen pertsona kopurua adierazten du), beherantz egiten jarraitzen du, eta lau egunean ia 10 ehunen jaitsi da. Hala, epidemiologoek gomendatzen duten langatik (1) behera egoten jarraitzen du: 0,83an, hain justu (ostegunean 0,92an kokatu zen). Araban dute indize handiena (0,99); Gipuzkoan, EAEko batez besteko bera dute (0,83) eta Bizkaian, hortik beherago (0,78).
Transmisioan izandako beherakada hori ez da oraindik ospitaleetan igarri, eta erietxeetako presioak bere horretan jarraitzen du; aitzitik, ZIUetan dauden erien kopurua igo egin da ostegunetik, eta 142 pertsona daude larri (duela lau egun 136 ziren). Era berean, 780 pertsona daude ospitaleratuta (ostegunean 807 ziren).
Azken 14 egunetako intzidentzia metatuak puztuta jarraitzen du, baina jaitsi egin da, 100.000 biztanleko 6.235 kasuraino. Hori horrela, ostegunetik 700 puntu inguru egin du behera. Igande honetan 9.820 proba diagnostiko egin dituzte, eta horietako 3.806 izan dira positibo. Datua nabarmen jaitsi da asteazkenekoarekin alderatuta (9.000 kutsatze berri pasatxo, hori da eskuragai dagoen azkena). Osakidetzak asteartean aldatu zuen protokoloa, eta ordutik autodiagnostiko testetan positibo emandakoek ez dute jakinarazi behar, sintoma larriak ez badituzte behintzat. Hala, beherakada espero zen eguneroko positiboen kopuruan.
Dena dela, aipatu behar da eguneko kutsatzeen kopurua 8.000tik gora egon dela larunbatera arte (asteartean jo zuen goia, 12.000 positiborekin), eta aste guztian ia 60.000 izan dira.
Intzidentziari dagokionez, Gipuzkoak du tasa handiena (6.327 kasu 100.000 biztanleko), baina lurralde horretan egin du behera gehien (ia 1.000 kasu gutxiago). Bizkaiak, bestalde, 6.131 kasu metatu ditu. Araban gorabeheratsua izan da bilakaera, ostegunetik ia 400 puntu igo baita, azken bi egunetan jaitsi bada ere.
Adin tarteei erreparatuta, 40-49 urtekoak kolpatu ditu gogorren izurriak, eta intzidentzia metatua 8.600 kasutik gorakoa da 100.000 biztanleko. Ondoren, 30-39 urtekoak ageri dira (pilatutako tasa 8.000 puntutik gora dago). Ifrentzuan, tasa baxuenak 60-69 eta 70-79 urtekoen artean atzeman dituzte, 100.000 biztanleko 3.000 ingurukoak.
Pandemiak herriz herri duen egoera neurtzen duen koronabirusaren semaforoan ez da kolore aldaketarik izan, eta udalerri guztiak gorrian daude. Halere, hainbat udalerri handi (5.000 biztanle baino gehiago) 5.000 kasutik behera jaitsi dira; Gorliz, Ortuella eta Trapagaran (Bizkaia) edota Agurain (Araba), besteak beste.
Zure interesekoa izan daiteke
Etxegabetzeen aurkako dekretua luzatzeko eskatu dute, 2026an dozenaka familia kalean ez geratzeko
Donostian egindako prentsaurreko batean, Kaleratzeak Stop elkarteko ordezkariek, EH Bilduko, Podemoseko eta EB-IUko kideekin batera, abenduaren 31n amaituko den "babes soziala" luzatzeko eskatu dute, eta Eusko Legebiltzarrak aste honetan onartutako Etxebizitzaren, Lurzoruaren eta Hirigintzaren arloko Premiazko Neurriei buruzko Legearen kontra agertu dira.
Mitika diskotekako atezain batek kolpatuta hil zen Kerman Villate gaztea omendu dute Gasteizen
Kerman Villateren senideek prozesu judizialaren nondik norakoak salatu dituzte, eta egia eta justiziaren bila jarraituko dutela adierazi dute. Ehunka pertsona bildu dira Kermanen omenez egindako ekitaldian.
UEMAren esanetan, 2026ak “hizkuntza politika berriaren orubeak sendotzeko urtea” izan behar du
Urdiain eta Zeberio sartuta, 120 udalerrik osatzen dute jada Udalerri Euskaldunen Mankomunitatea (355.000 biztanle). Euskararen kontrako oldarraldia dela eta, “euskarak benetako lege-babesa izan dezan akordioak adosteko ahalegin guztiak” egingo dituela esan du Martin Aramendi UEMAko lehendakariak.
Zorteak irribarre egin dio Barakaldori: loteriaren bigarren sari batek 1,2 milioi euro utzi ditu
Larunbat honetako Espainiako Loteriaren zozketak 1,2 milioi euro utzi ditu Barakaldon. Loteriaren 17. administrazioak oso-osorik saldu du bertan 54299 zenbakia.
Adingabe batek Getxoko talde batean jasandako erasoak eta jazarpena salatu ditu horren familiak
Biktimak bi urtez jaso ditu ezkutuko deiak, irainak, jazarpena sare sozialetan eta eraso fisikoak. Eraso larriena udan jaso zuen, erasotzaileek inguratu eta jo egin baitzuten. Konortea galduta, lurrera erori zen, eta erasoa grabatu egin zuten.
1932an Eibarrek Niceto Alcala Zamorari oparitutako pistola berreskuratu dute Frantzian
Pistola 1931 eta 1936 artean II. Errepublikako presidente izan zen Alcala Zamorari oparitu zioten Eibarko elkarte errepublikarreko emakume talde batek. Frantziako poliziak urtarrilean berreskuratu zuen legez kanpo bildumagile frantziarren eskuetan zegoen arma.
Aita Marik 56 pertsona erreskatatu ditu 2025eko azken misioan
Erreskatea gaur goizean egin dute, Lampedusatik 34 mila nautika hegoekialdera. Erreskatatutakoen artean 7 haurtxo eta 16 adingabe daude. Bi hilabeteko haurra eta bere gurasoak Aita Maritik eraman behar izan dituzte haurrak muturreko desnutrizioa eta deshidratazioa zituelako.
Iruñeko Irabia ikastetxeko ikasle ohi batek salatu du Opus Deiko apaiz batek sexu erasoak egin zizkiola nerabezaroan
Opus Deik, bere aldetik, gertatutakoa onartu du, bai eta Donostian eta Madrilen ere antzeko bi kasu izan zirela argitu ere. Lehenengoa, adingabe batekin jazo zen; bigarrena, berriz, 45 urteko emakume batekin.
VacaPop, ganadua erosi eta saltzeko aplikazioa: “Edadekoak ere hasi dira, pixkanaka, erabiltzen”
Inora joan beharrik gabe abereak saldu eta erosteko helburuarekin sortu da VacaPop mugikorrerako aplikazioa. Azoken zain egon barik, Internet bidez behiak, zaldiak, ahuntzak, landako makinaria eta bazka saldu eta erostea posible da honezkero. Oier Aizpuru eta Aitzol Gorospe abeltzain gazteek adierazi dutenez, oso erraza eta azkarra da. Nabarmendu dute, halaber, tratuak era tradizionalean ixten direla, alegia, aurrez aurre.
“Gure hezkuntza, euskalduna” lelopean, milaka ikasle kalera atera dira
Hego Euskal Herriko ikasleriak bat egin du Ikamak deituriko greba egunarekin. Manifestazio jendetsuak egin dira Iruñean, Gasteizen, Bilbon eta Donostian. Euskara oldarraldi judizial eta politiko bat jasaten ari dela eta indarrean dagoen hezkuntza ereduak euskara mesprexatzen duela salatu dute.