Ukrainatik iritsi diren 417 pertsona daude dagoeneko Nafarroan, horietatik 192 adingabeak

Ukrainatik ihesi dagoeneko 417 pertsona iritsi dira Nafarroara. Horietatik 192 adingabeak dira eta guztiak heldu batez lagunduta etorri dira. 85 pertsona artatu dituzte lehen arretan, batez ere Gurutze Gorrian, eta gainerakoak senideek, ukrainar komunitateak edo partikularrek jaso dituzte.

Eduardo Santos Migrazio Politiken kontseilariak azaldu duenez, "une honetan ez dago bakarrik heldu den adingaberik". Hala ere, adierazi du Eskubide Sozialen departamentuarekin lanean ari direla protokolo bat martxan jartzeko, aukera hori emango balitz ere.

Santosen arabera, gaur egun 333 harrera-leku daude aurreikusita, baina Nasuvinsarekin ari dira lanean, plaza kopurua pixkanaka handitzeko. Ildo horretan, nabarmendu du oso garrantzitsua dela errefuxiatuak har ditzaketen etxebizitzak dituzten pertsonak Etxebizitza Departamentuarekin harremanetan jartzea.

Foru Gobernuak martxan jarritako ucrania@navarra.es larrialdietarako bulegotik pasatzera deitu ditu Santosek Ukrainatik Nafarroara iristsitako pertsonak, bertatik Gobernuaren Ordezkaritzaren bulegora bideratzen delako. Bulegoak 66 pertsona artatu ditu dagoeneko, eta osasun- eta hezkuntza-laguntza eta arropa edo elikagaiak ematen zaizkie, besteak beste.

Bestalde, Carlos Gimeno Hezkuntzako kontseilariak Ukrainatik etorritako adingabeen eskolatzeari buruzko xehetasunak eman ditu, eta dierazi duenez, "ikastetxeen antolakuntza- eta curriculum-neurriak aurreikusita daude, baita ikastetxeen harrera-plana ere". Era berean, hezkuntza-premien arreta ohiko moduan egingo dela azpimarratu du, paradigma normalizatu eta inklusibo batean, eta ez salbuespenezko neurriekin.

Ukrainako gerrak eztanda egin aurretik, 274 ikasle ukrainar, 67 errusiar eta 7 bielorrusiar zeuden Nafarroako hezkuntza-sisteman. Datu horiek eguneratu egingo dira Ukrainako ikasle gehiago sartu ahala.