Gizon batek emazte ohia hil du Bartzelonan

Gizonak bere burua entregatu eta hilketa aitortu du.

AGENTZIAK | EITB MEDIA

2022/03/22 - 07:56

Azken eguneratzea

2022/03/22 - 07:30

Gizon batek emazte ohia hil zuen atzo Bartzelonako Sant Marti barrutiko etxebizitza batean, Esquadra Mossoek jakinarazi dutenez.

Iturri horren arabera, 18:30 aldera gizon bat Bartzelonako Udaltzaingoaren komisariara joan zen eta bikotekide ohia hil zuela aitortu zuen.

Etxebizitzara bertaratu ziren agenteek biktimaren gorpua aurkitu zuten bertan. Lehen zantzuen arabera, bortizki hil zen, eta, ondorioz, ustezko hiltzailea atxilotu egin zuten.

Bartzelonako Metropoliko Ikerketa Kriminaleko agenteek beren gain hartu dute ikerketa.

Atxilotua datozen orduotan eramango dute emakumeen aurkako indarkeriaren epaitegira, Kataluniako Justizia Auzitegi Nagusiak jakitera eman duenez.

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta/edo deitu doako telefono hauetara: 900 840 111 (EAEkoa), 016 (Espainiako Estatukoa) edo 3919 (Iparraldekoa, eguneko 24 orduetan erabilgarri, igande eta jaiegunetan 09:00etatik 18:00etara izan ezik). Ez dute fakturan arrastorik uzten, baina bai telefonoan. Beraz, ez ahaztu ezabatzea.