Benedikto XVI.ak sexu-abusuen itzal luzea du gainean

Benedikto XVI.a, 95 urterekin hil berri dena, izan zen Eliza barruko sexu-abusuen gaiari publikoki aurre egin zion lehenengo aita santua, baina kasuek zipriztindu egin zuten eta "barkamena" eskatu behar izan zuen bere bizitzaren amaieran.

"Erabateko lotsa, min handia eta barkamen eskaera soilik ager diezaieket sexu-gehiegikerien biktimei", adierazi zuen 2022 hasieran bidalitako gutun batean Ratzingerrek.

Munich txostena

Aita santu emerituak horrela erantzun zion Municheko artzapezpiku zenean (1977-1982) sexu-abusuen berri zuela zioen txostenari. Abusatzaileak beste gotzaindegi batzuetara bidali besterik ez zituztela egin agertzen zen dokumentuan.

Barkamena eskatu baino egun batzuk lehenago, gainera, Georg Batzing Alemaniako Gotzainen Biltzarreko presidenteak horixe egiteko eta kasuak ezkutatzen izan zuen ardura aitortzeko eskatu zion.

Hala eta guztiz ere, Benedikto XVI.ak ukatu egin zuen kasuen berri zuenik, eta munduan zehar egindako bidaietan biktimekin elkartu zela gogorarazi zuen. "Erregutu diezaiogun Jainkoari gure erruak, gure erru handi eta itzelak barka ditzala", adierazi zuen.

Juan Pablo II.aren Fedearen Doktrinaren Kongregazioaren (1981-2005) buru zenean ere atzetik zuen abusuen auzia, gaia oraindik tabu zenean.

1988ko Ratzingerren gutun batzuetan agertzen du Zuzenbide Kanonikoa aldatzeko beharra "moralaren aurkako delitu larrienen" harira, eta burura eraman zuen bere asmoa 2001ean, "De delictis gravioribus" txostenean.

2010ean indartu zuten testua, aita santu zenean,adingabeak buruko desgaitasunen bat duten helduen pare jartzean Seigarren Manamenduaren (Ez duzu ekintza ezpururik egingo) biktimen kasuan.

Besteak beste, "delitu" gisa jasotzen zen "elizgizon batek 14 urtetik beherako adingabeen irudi pornografikoak edukitzea, egitea edo zabaltzea, edozein dela ere helburua".

Biktimei laguntzeko beharra aipatzen zen bertan, eta elizgizonak heztea adingabeen babesean eta Zuzenbide Kanonikoaren aplikazioan.

2006an, berriz, erabaki garrantzitsua hartu zuen arazoarekin lotuta: kargugabetu egin zuen Kristoren Legionarioen fundatzailea, Marcial Maciel, abusu eta mehatxuengatik.

Lehenengo harria

Ratzinger, fedearen eta tradizioaren zaintzari bere bizitza eskaini zionak, pederastia-eskandaluei Elizak emandako erantzunaren oinarriak jarri zituen, eta bere oinordeko Frantziskori bide eman zion sakoneko berrikuntzekin aurre egiteko.

Hala eta guztiz ere, bere ahaleginek ez zuten eragotzi gehiegikeriak mundu osoko elizbarrutietan zabaltzea edo hamarkadetan zehar Theodore McCarrick Washingtongo artzapezpikuarena bezalako kasuak egotea.

68ko maiatza?

Kontua da gaitz honek aita santua jarraitu duela bere erretiroan ere, Mater Ecclesiae monasterio vatikanoko harresien artean, bere ondorengoari zin egin zion isiltasuna hausteraino.

2019ko apirilean Alemaniako kleroaren aldizkari batean ezustean argitaratutako dokumentu batean, "Eliza eta sexu-abusuak" izenekoan, Ratzingerrek arazoa gizartearen ustezko kolapso moral batekin lotzen zuen, batez ere 1960ko hamarkadatik aurrera.

Izan ere, 1968ko maiatza aipatzen zuen; izan ere, arazoa eragin zuen arrazoien artean, honako hau aipatzen zuen: "Erabateko sexu-askatasuna zegoen, jada araurik ez zuena", eta horrek "lotura handia du buruko kolapso horrekin".

Azken batean, Benedikto XVI.ak lehen urratsak eman zituen abusuen aurkako borrokan, eta bere ondorengo Frantziskori utzi zion esaldi hau: "Barkamenak ez du justizia ordezkatzen".