EAEko Auzitegi Gorenak indarrik gabe utzi du Erromoko Nagusien Etxearen eraispena gelditzea

Getxoko Udalak positibotzat jo du Euskal Autonomia Erkidegoko Justizia Auzitegi Nagusiak (EAEAN) igorritako aldeko epaia, Nagusien Etxea eta Udal Euskaltegia hartzen dituen eraikinaren eraispena bertan behera uzten duena.

Udalak ohar baten bidez adierazi duenez, epai horrek "lehentasuna ematen dio proiektu berriari hasiera emateko beharraren interes orokorrari, Udalak obra martxan jartzeko jaso dituen funtsak arriskuan egon ez daitezen".

Behin eraispena eragozten zuen neurria indarrik gabe geratuta, udal zerbitzu juridikoak, Foru Aldundikoekin harremanetan jarrita, lana nola gauzatu aztertzen ari dira.

Eraitsiko duten eraikinak hartzen duen orubeak eraiki behar duten belaunaldiarteko zentro berriak mendekotasuna duten adinekoentzako 100 foru-plaza eta gazteentzako 40 udal-zuzkidura-bizitoki hartuko ditu, eta eraikinaren beheko solairuan 283 metro koadroko lokal bat, Ibar Nagusien Etxea elkartea etorkizunean birkokatzeko.

Udalak adierazi duenez, "adin ezberdinetako pertsonen arteko bizikidetza" Legegintzaldi Planaren baitan hartutako konpromisoetako bat da, eta Europaren babesa du, "Next Generation" funtsen bidez, aurreikusitako inbertsioaren % 82,5erako.