Lau pertsona artatu dituzte, kea arnasteagatik, Beasaingo etxebizitza eraikin batean piztu den sutean

Sute bat piztu da, 12:30 aldera, Beasaingo Jose Martin Arana kaleko etxebizitza eraikin batean. Kea arnastuta, hainbat pertsona eraman behar izan dituzte Zumarragako ospitalera, Beasaingo Udaltzaingoak eitb.eus-eri jakinarazi dionez.

Hiru suhiltzaile talde bertaratu dira sutea piztu den lekura.

Oraingoz ez dute argitu zerk eragin duen sutea, baina dagoeneko itzali dute. Iturri horien arabera, kaltetutako etxebizitzaren elektrizitate sistema ikertzen dabiltza orain.

Leire Artola Beasaingo alkateak azaldu duenez, Udaleko teknikariak sutea izan den eraikinean izan dira eta, itxura batean, egitura nagusia ez dago arriskuan. Lehen ikerketen arabera, baliteke sutea berogailu batean piztu izana.