Bi atxilotu Tuteran, igogailuan harrapatuta gelditu eta erreskatatzera joandakoei eraso egiten saiatzeagatik

Tuterako Udaltzaingoak 28 eta 31 urteko bi gizon atxilotu ditu bart goizaldean, igogailu batean harrapatuta gelditu, kalteak eragin eta erreskatatzera joan diren agenteei eraso egiten ahalegintzea leporatuta.

Gauerdia pasata, etxebizitza eraikin bateko bizilagun batzuek Udaltzaingoari ohartarazi diote igogailu barruan norbait zegoela eta kolpeak ematen ari zirela.

Bosgarren eta seigarren solairuaren artean ez atzera ez aurrera gelditu den igogailuaren ateak ireki ondoren, barruan harrapatuta zeuden bi lagunek agenteak iraindu dituzte eta eraso egiten ahalegindu dira. Ondorioz, agenteek mendean hartu eta atxilotu egin dituzte.

Halaber, igogailu barruan kalte handiak eragitea leporatu diete.