Gizakien salerosketaren eta sexu-esplotazioaren biktima ziren bost emakume askatu dituzte Madrilen

Gainera, txinatar jatorriko sare bat desegin du Poliziak. Bost atxilotuek bizi-maila handiaz gozatzen zuten, egindako ekintza kriminalen bidez lortutako dirutzari esker.

AGENTZIAK | EITB MEDIA

2023/05/20 - 15:27

Azken eguneratzea

2023/05/20 - 15:27

Gizakien salerosketaren biktima ziren bost emakume askatu ditu Polizia Nazionalak Madrilen, eta horiek prostituitzera behartzen zuen sare kriminala desegin du. Txinatar jatorriko familia bereko bi emakumezkok eta hiru gizonezkok osatzen zuten sarea, eta bizi-maila handiaz gozatzen zuten, euren sare kriminalaren bidez lortutako dirutzari esker. Horrela, milioi euro baino gehiagoko higiezin-ondasunak zituzten Madrilen, eta gama handiko ibilgailuak, eta horiek guztiak atzeman dizkiete, Poliziak ohar baten bidez jakinarazi duenez.

Sare kriminala Madrilen aritzen zen, eta Txinan biltzen zituen biktimak. Engainuen bidez, Espainiara ekartzen omen zituzten emakumezkoak. Sareetako batek Barajaseko aireportuan jaso eta Madrilgo Hortaleza barrutian kokatutako txalet batera eramaten zituen. Espainiar Estatuan egoteko dokumentazioa edo lanpostu bat lortuko zietela agintzen zieten emakumeei baina, behin txalet horretara iritsita, sexu-esplotazioa egiten zieten.

Emakumezko horiek askatzearekin batera, sare kriminaleko bost kideak atxilotu ditu Poliziak Arroyomolinosen, El Vellonen eta Madrilen bertan. Sexu-esplotazioa egiteko emakumeen salerosketa, prostituzioa eta talde kriminaleko kidea izatea delituak leporatu dizkiete.

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta/edo deitu doako telefono hauetara: 900 840 111 (EAEkoa), 016 (Espainiako Estatukoa) edo 3919 (Iparraldekoa, eguneko 24 orduetan erabilgarri, igande eta jaiegunetan 09:00etatik 18:00etara izan ezik). Ez dute fakturan arrastorik uzten, baina bai telefonoan. Beraz, ez ahaztu ezabatzea.