Milaka gasteiztarrek hartu dute Zeledon Gorka Ortiz de Urbinaren azken jaitsieran, eta festa lehertu da

Milaka gasteiztarrek jaso dute gaur Zeledon, eta jaiaren eta zalapartaren buruzagi "izendatu" dute Gasteizko Andre Maria Zuriaren jaien sei egunetarako. Gasteizko Andre Maria Zuriaren jaiak hasi dira. Gorka Ortiz de Urbinaren agurra izan da, 21 ediziotan jaietako ikurra izan den baserritarraren papera egin ondoren.

Zalduondoko baserritarrak ez du hutsik egin, eta San Migel elizako kanpandorretik jaitsi da. Aldez aurretik, txupinazoak Andre Maria Zuriaren plazan zeuden milaka pertsonen poztasuna eragin du. Alaveseko ordezkariek bota dute txupinazoa aurten.

Zehazki, Victor Laguardia (kapitain ohia), Antonio Sivera (kapitaina) eta Alba Aznar (Gloriosasen kapitaina) eta Mery Ortiz de Pinedo (Gloriosasen kapitain ohia) izan dira Alavesen ordezkariak. Aratz eta Raul Corralejo eta Leire Ruiz de Apodaca Iraultza 1921 peñako kideek ere parte hartu dute.

Esan bezala, aurtengoa jaitsierarik hunkigarriena izan da, Gorka Ortiz de Urbinak azken aldiz gorpuztu baitu Zeledon.

Maider Etxebarria alkateari, Udalbatzako kideei eta Alaveseko ordezkariei zapia jarri ostean, Zeledonek mikrofonoa hartu du.

"Gora Gasteiz! Gora Andre Maria Zuriaren jaiak! Gora Zeledon!" klasikoak oihukatu ondoren, 21 jaitsiera izan direla gogorarazi du Gorka Ortiz de Urbinak. "Primeran tratatu nauzue, beti eramango zaituztet bihotzean!", eskertu du.

Ondoren, Alavesen ereserkiarekin ausartu da Zeledon, plaza osoa lagun izan duelarik. Ortiz de Urbinak eskerrak eman ditu berriro, eta "besarkada" batekin agur esan du, baina mikrofonoa berriro hartu behar izan du, plazan bildutako milaka gasteiztarrek eskatuta. "Bat gehiago eta alde egingo dut", esan du, eta kantuan hasi da berriz.

Jaiek tarte zabala izango dute EITBko hedabideetan. Andre Maria Zuriaren jaien hasiera izan da. 400 ekitaldi baino gehiago antolatu dira; tradizionalak, hilaren 5eko goizaldeko egunsentiko arrosarioaren prozesioa, blusa eta nesken ekitaldiak eta kontzertuak tartean.

Andre Maria Zuriaren jaietako ekitaldi erakargarrienetakoak kalejirak izaten dira, 29 kuadrilla eta 7.000 blusa eta neska biltzen baitituzte zezen-plazara joan-etorrian, nahiz eta zezenketarik ez egon.

Gaur bertan iritsiko da gehien espero den kontzertuetako bat, En Tol Sarmiento (ETS) talde arabarrarena, Foruen plazan. Musika emanaldien agertoki nagusi izango den horretan, gaurkoaren ostean, Camela (abuztuaren 5ean), Victor Manuel (abuztuaren 6an), Lagrimas de Sangre (abuztuaren 7an) eta Huntza (abuztuaren 8an) igoko dira oholtza gainera.

Halaber, Alaska on Tour, Benidorm, En Esenzia, Formula Show, Magia Negra eta Krypton taldeak arituko dira Espainia plazan, eta txosnetan, Los Chicos del Maiz, Belako eta Albany, besteak beste.

Antzoki Zaharrean, 'Un Oscar para oscar', 'Platanos cacahuetes y lo que el viento se llevo' eta 'Adictos' antzezlanak izango dira ikusgai, eta Mendizabalan, gauero, 23:00etan, su artifizialak.

Bestalde, Iratxe Calvo, 11 urtekoa eta Siberiarrak kuadrillakoa, eta Amets Busto, 13 urtekoa eta Nekazariak taldekoa, Edurne eta Zeledon Txiki bihurtuko dira.

Guztira, sei jaiegun izango dira aurten Gasteizko jaietan. Abuztuaren 10ean, goizaldeko ordu batean, Zeledon kanpandorrera itzuliko da, eta Gorka Ortiz de Urbinaren ordezkoa bilatzeko unea izango da, baina urtebeteko tartea izango dute gasteiztarrek horretarako.