Valentziako sutean hildakoak 9 direla baieztatu du Poliziak

Bederatzi lagun hil dira eta 15 artatu behar izan dituzte Valentzian bi etxebizitza eraikin kiskali dituen sutea tarteko. Sua Campanas auzoko 14 solairuko eraikin batean piztu zen atzo arratsaldean, General Aviles eta Maestro Rodrigo kaleen artean.

Hasiera batean, Pilar Bernabe Espainiako Gobernuak Valentzian duen ordezkariak iragarri du 10 pertsona hil direla sutean, baina Polizia Zientifikoak 9ra jaitsi du zifra handik eta ordu batzuetara, biktima guztien gorpuak berreskuratu eta gero.

Suhiltzaileak

Suhiltzaileek, Espainiako Larrialdietako Unitate Militarraren (UME) laguntzarekin, eraikina freskatzen eman dute gaua. Gaur goizean ez da sugarrik ikusten, baina bai ke ugari. Ingurua hesituta dute, eta trafikora itxita. 11:30 aldera, Polizia zientifikoko hainbat kide eta suhiltzaileak eraikin barrura sartu dira, hura bermatuta zegoela egiaztatu ondoren. Adituen arabera, eraikinak ez dira behera etorriko. 

15 pertsona zauritu ziren hausturengatik, erredurengatik edo kea arnasteagatik. Tartean zazpi suhiltzaile eta adingabe bat daude. Biharamunean, bi pertsonak (suhiltzaile) jarraitzen dute erietxean, baina euren bizia ez dago arriskuan. 

Sutea atzoko 17:30ean piztu zen 14 solairuko 5.ean, eta ordu erdiko tarte eskasean eraikin guztira eta aldamenekora zabaldu zen. Egituretan aditu diren batzuen arabera, fatxada aireztatua zuen eraikinak, eta zati bat poliuretanozkoa zen, sugarria eta berez bakarrik ipini ezin daitekeen materiala.

Hala ere, Poliuretano Zurrunaren Industria Elkarteak (IPUR) ohar batean adierazi duenez, material hori ez dago "ez kanpoko estalduraren betelan gisa, ez aire-ganberako material isolatzaile gisa". Gainera, kanpoko estaldura aluminiozko bi xaflaz eta zurruntasuna emateko material betegarri batez osatutako "konposite" panel batez osatuta dagoela adierazi du. "Kasu honetan ere ez da poliuretanoa", ohartarazi du.

Bestalde, Suteen Aurkako Espainiako Babes Elkarteak (Tecnifuego) eraikinaren "estalduran zegoen material erregaia" seinalatu du, baina ez du uste poliuretanoa denik, baina zehaztu du oraindik ez dagoela "ezer argi eta suhiltzaileen txostenaren zain egon behar dela".

Isolamendu Instalatzaileen Elkarteak (Aisla) errefusatu degin ditu "azken orduetan poliuretanoaren aurka egindako erasoak", eta adierazi du, bere informazioen arabera, blokeak ez zuela produktu horren isolamendurik aireztatutako fatxadako ganberan, eta "faltsuak" direla "sua zabaltzen duen eragilea" izatearen akusazioak.

Era berean, Material Isolatzaileen Fabrikatzaile Elkarteak (Andimat) zuhurtziaz jokatzeko eskatu du eraikinean erabilitako materialak, produktuak edo sistemak aipatzerakoan, txosten ofizial baten zain. Elkarte horrek azpimarratu duenez, "ez dago poliuretanoa istripua izan zuen eraikinaren fatxadaren parte zela adierazten duen frogarik".

Luis Sendra Valentziako Arkitektoen Elkargoko presidenteak adierazi duenez, fatxadak "tximinia efektua egin du eta horrek garrak hedarazi ditu". Gainera, mendebaldeko haizea zebilen, 50-60 km/h-ko ufadekin.

Bi eraikinen FBEX enpresa etxegileak horiek saltzeko erabili zuen promozio bideoa ezagutu da gaur. Horren arabera, eraikinak "aluminioz egindako material berritzaile batekin zeuden estalita". Eraikinak 2005 eta 2007 urteen artean altxatu ziren, hirigintza boom betean. FBEX enpresak porrot egin zuen handik urte batzuetara. Bideoan esaten zenez, eraikinak "abanguardiakoak" ziren, "igogailu panoramiko batekin lotuak". Erabilitako materialak "puntako kalitatekoak" omen ziren, "kalitate kontrol zorrotzekin probatuak".

Hiru dolu egun eta dirulaguntzak iragarri dituzte agintariek

Carlos Mazon Valentziako Generalitateko presidentea, Maria Jose Catala Valentziako alkatea eta Vicent Monpo Diputazioko burua sutearen kontura paratu duten aginte postura hurbildu dira goizean. Hiru dolu egun ezarri dituzte Valentzia hirian eta erkidegoan. Bihar, larunbatarekin, elkarretaratze isila egingo dute 12:00etan Udaletxean. 

Valentziako Udalak eta Fallen Batzorde Zentralak 'Crida' izeneko festa —Fallen abiapuntu dena, igandean egitekoa— bertan behera uztea ebatzi dute. Halaber, asteburuko ekitaldi guztiak ere bertan behera geratu dira.

Era berean, Espainiako Futbol Federazioak onartu egin du Valentzia futbol taldeak Granadan jokatu behar zuen partida, eta Levantek etxean Andorraren aurka jokatu behar zuena atzeratzea.

Valentziako alkateak eta Generalitateko presidenteak suteak kaltetutako bizilagunentzat hainbat laguntza lerro iragarri dituzte. Besteak beste, 6.000 eta 10.000 euro artean bideratuko dituzte herritarron lehen beharrizanak asetzeko, eta gerora, hilean 1.000-1.500 euroko beste laguntza bat. Halaber, Udalak berriki erosi dituen 113 etxebizitza jarriko ditu familion esku. Era berean, laguntzok kobratzeko edo bestelako izapideak egiteko bulego bakarra eta laguntza psikologikoko zerbitzu iraunkorra jarriko dituzte. 

Bestalde, Pedro Sanchez Espainiako Gobernuko presidentea Valentziara joan da gaur sutearen nondik norakoak bertatik bertara ezagutzera. 

Kazetarien aurrean egindako agerraldi labur batean, Sanchezek babesa eta elkartasuna adierazi die kaltetutako bizilagunei eta laguntzak eta baliabideak eskainiko dizkietela agindu du. Horren ustez, orain "lehentasuna biktimak topatzea da" eta erietxean jarraitzen duten bost pertsonak hobera egitea. Larrialdi zerbitzuen lana goraipatu eta euren garrantzia ere nabarmendu du Sanchezek.