Bruselak "gogoan hartu du" euskara, katalana eta galizieraren ofizialtasuna, baina ez du eztabaida abiatu

Espainiako Gobernuak bost eta hamar minutu bitartean eman ditu gaur sei orrialdeko eta 16 puntuko dokumentua azaltzen, Gai Orokorren Kontseiluaren bileran. Bertan adierazten denez, "hizkuntza-aniztasuna bereziki garrantzitsua da Espainian, herrialdearen nortasun nazionalaren eta konstituzionalaren funtsezko aldea baita".

Azalpenaren ostean, gainerako Estatuek ez dute hitza hartu, eta, beraz, gaia ez da eztabaidatu, Belgikako Atzerri ministro Hadja Lahbibek bileraren osteko prentsaurrekoan azaldu duenez. "Gogoan hartu dugu. Ez da eztabaidarik izan eta hurrengo Gai Orokorren Kontseiluan zer gertatzen den ikusiko dugu", esan du ministroak, xehetasun gehiagorik eman gabe.

Espainiako Gobernuak duela bi aste eskatu zuen gai hori Europako Gaietarako ministroek gaur Bruselan izan duten bileraren gai-zerrendan sartzea, eta Belgikak, seihileko honetan EBko txandakako presidentetza bere gain hartu duenak, eskaera onartu zuen, estatu batek gai bat jorratzea eskatzen duen bakoitzean ohi den bezala.

Espainiak joan den abuztuan EBko hizkuntza-erregelamendua aldatzeko eskatu zuenetik, Espainiako Gobernuak harreman informalak izan ditu EBko Kontseiluaren zerbitzu juridikoekin, eta hainbat iturrik adierazi dutenez, Gobernuaren eta erakundearen lege-aholkularien artean iritzi kontrajarriak daude.

Baina truke informal horietatik harago, Espainiako Gobernuak ez die oraindik txostenik eskatu EBko Kontseiluko zerbitzu juridikoei neurriaren legezkotasuna bermatzeko. Europako hainbat estatuk Espainiaren proposamenaren inguruan dituzten zalantzak argituko dituen txosten horren zain, zaila izango da gaia berriro aztertzea maila politikoan, Europako iturriek onartu dutenez.

Gainera, zalantza legalak alde batera utzita, mesfidantza politikoak ere badaude, Anders Adlercreutz Finlandiako Europako Gaietarako ministroak gaur adierazi duenez. Ministroaren ahotan, bere herrialdearentzat "kezka nagusia" katalanaren, euskararen eta galizieraren ofizialtasuna onartzeak izan dezakeen ondorioa da; izan ere, Finlandiako iparraldean samiz egiten da, hizkuntza gutxitua.

Neurriak erabateko adostasuna behar du aurrera ateratzeko, eta adostasunik ez dagoenez, Fernando Sampedro Estatu idazkari espainiarrak gaur ziurtatu duenez, "beste dokumentu batzuk beharko balira", Espainiako Gobernuak entregatu egingo ditu, "Espainiak ez baitu aldarrikapena bertan behera utziko".

Espainiak, bestalde, neurriaren kostuak ordaintzeko konpromisoa hartu du, hainbat estatuk zalantzak azaldu baitituzte.