Auzitegi Nagusiak ebatzi du Jaurlaritzak ez duela enplegua sendotzeko legea bete Haurreskoletan

EAEko Justizia Auzitegi Nagusiak ebatzi du Eusko Jaurlaritzak ez duela bete enplegu publikoa sendotzeko Iceta legea Haurreskolak partzuergoaren kasuan, eta, beraz, 77 plaza gehiago deitu behar ditu estabilizazio prozesura, hau da, hasieran deitutakoa baino % 30 gehiago. Jaurlaritzak erabakiaren aurkako helegitea aurkeztu du Auzitegi Gorenean.

ELA sindikatuak gogorarazi duenez, Partzuergoak 264 hezitzaile lanpostu deitu zituen estabilizazio prozesuan, eta auzitegiak "77 lanpostu gehiago gutxienez deitu behar zirela ebatzi berri du, deitutakoak baino %30 lanpostu gehiago alegia".

"Honek 77 langile gehiago kontsolidatzeaz gain, behin behinekotasunarekin amaitzeko Administrazioaren borondate eza eta legezko ez betetzea agerian utzi ditu", gehitu du ELAk.

Sindikatuaren ustez, ebazpen judizialak "baieztatzen du Eusko Jaurlaritzak eta bere baitako administrazio askok, horien artean Haurreskolak Partzuergoak", ez dituztela prozesuak "behar bezala gauzatu", ELAk hainbatetan salatu duenez.

ELAren arabera, Iceta legeak "hainbat gabezia eta berme falta zituen", baina "aurretik ematen ez zen aukera bat zabaldu zuen". Hala ere, Eusko Jaurlaritzak eta administrazioek " borondate gutxi izan dute behin-behinekotasunaren arazoari konponbidea emateko".

"Oro har, ahalik eta lanpostu gutxien eskaintzea eta ahalik eta langile gutxien kontsolidatzea izan da administrazioen helburua", esan du sindikatuak.

Sindikatuak gogorarazi duenez, beste eremu batzuetako prozesuak ere "auziperatuak" ditu, eta EAEko Justizia Auzitegi Nagusiaren ebazpen hau Osakidetzara edo Hezkuntza Publikora hedatuko balitz, milaka lanpostu gehiago deitu beharko lirateke.

Eusko Jaurlaritzaren errekurtsoa

EAEko Justizia Auzitegi Nagusiak egindako kalkulua, ordea, ez dator bat Eusko Jaurlaritzakoarekin, eta, beraz, Bingen Zupiria bozeramaileak iragarri duenez, Exekutiboak helegitea jarri du.

Bozeramailearen arabera, ez da "gai berria, behin eta berriz errepikatzen den gaia da, eta hainbat administraziotan gertatzen ari da".

Prozesuetako lanpostu kopuruaren kalkulua "eztabaidan dago, eta Auzitegi Nagusiak gai horri buruzko erabakia hartu du, esan dezagun, haiek baietsi dituzten baina Eusko Jaurlaritzak egindako kalkuluekin bat ez datozen zenbakietan oinarrituta, eta horregatik erabaki dugu errekurtso hori aurkeztea Auzitegi Gorenean, organo horrek har dezan behin betiko erabakia", azaldu du.

Zupiriak azpimarratu du zalantzarik ez dagoela prozesu "konplexu" hori denboran luzatuko dela. Nolanahi ere, "Eusko Jaurlaritzak bere gain hartu du behin-behinekotasun-tasa % 8tik behera jaisteko konpromisoa".