Euskal herritarrak pozik daude euren bizimoduarekin: 7,3ko nota jarri diote

Euskal Autonomia Erkidegoko biztanleek 7,3ko nota jarri diote bizitzarekiko gogobetetzeari, zerotik hamarrera bitarteko eskalan, Eustatek egindako inkestaren arabera. Aurreko txostena 2018an egin zuten, eta orduan herritarrek 7,5ko puntuazioa eman zioten euren bizitzei. 

Bizitzarekiko gogobetetasun handiena beren osasuna "oso ona" dela uste duten pertsonen artean ikusten da (7,9); beren osasuna txarra edo oso txarra dela diotenen aldean, puntuaziorik baxuena erakusten dute (5,5).  16 eta 24 urte bitarteko gazteek ere batez besteko oso altua dute (7,8). 

Familia-motaren arabera, elkarrekin bizi diren seme-alabarik gabeko bikoteek 7,5eko puntuazioa lortu dute, pertsona bakarreko familien edo seme-alabaren bat duten guraso bakarren aurrean (7,0 eta 7,1, hurrenez hurren).

Gizonak (7,4) emakumeak (7,3) baino gusturago daude bizitzarekin; Araban (7,4), aldiz, Gipuzkoa eta Bizkaia (7,3) baino (hamarren bat gehiago). Jaiolekuari erreparatuz gero, balorazioa berdina da guztientzat (7,4), beste probintzia batzuetan jaiotakoen kasuan izan ezik, horiek izan baitute emaitzarik txarrena (7,2).

Norberaren bizitzaren balioak, hau da, norberaren bizitzak merezi duela kontuan hartzeak, 2018ko puntuazio berari eusten dio, eta, batez beste, 8 puntu ematen zaizkio. Biztanleriaren % 68,8k puntuazio altua ematen du, eta % 2,5ek, berriz, puntuazio txikia.

Gizonek 8 punturekin puntuatu dute bizitzaren balioa, hau da, emakumeena baino pixka bat altuago (7,9). 

Adierazle horrek emaitza okerragoak ematen ditu osasunaren pertzepzioak okerrera egiten duen heinean, eta ia bi puntuko aldakuntza ikusten da osasun oso ona dutela diotenen artean (8,5) eta osasun txarra edo oso txarra dutela uste dutenen artean (6,6). 

Harreman pertsonalekin ere, pozik

Harreman pertsonalak, gehien baloratutako alderdietako bat (7,5), oso osasun ona dutela adierazten duten pertsonen eta 16 eta 24 urte bitartekoen gehieneko puntuaziora iristen da (7,7 bi kasuetan), eta gutxieneko nota (7,0) beren osasuna txarra edo oso txarra dela adierazten dutenen artean ikusten da.

Bestalde, etxebizitzarekiko eta ingurunearekiko gogobetetasuna (7,2) adierazleari dagokionez, balio onenak osasun oso ona dutela adierazten duten pertsonen artean lortzen dira (7,5), eta, ondoren, gizonak daude (7,4), emakumeak baino gusturago baitaude (7,1).

Aisialdiarekiko gogobetetze-mailak 6,6ko batez besteko nota lortu du; 65 urte eta gehiagoko pertsonek baloratu dute ondoen adierazle hori (7,6), eta 35-49 urtekoek (5,7) notarik baxuena.

Etxeko ekonomiarekiko gogobetetasuna (6,9) adierazleak gora egiten du hautemandako osasunak gora egin ahala: osasun txarra edo oso txarra dutela dioten pertsonen artean 6,1 da adierazlea, eta beren osasuna oso ona dela adierazten dutenen artean, berriz, 7,3.

Azkenik, herritarren % 5,6k baino ez du konfiantza "handia" botere publikoetan, eta % 45,2k "gutxi" duela dio. Gainditu ez duen adierazle bakarra izan arren (4,6, batez beste), igoera nabarmena izan du aztertutako talde guztietan 2018ko edizioarekin alderatuta, batez besteko emaitza 6 hamarren handiagoa izan baita.