Uda oraindik ez da ohartu iritsi dela
Egun eguzkitsuak eta hondartzarako aproposak egon badira ere, eguraldia ez da egonkortu eta ez du bere aurpegi udatiarrena erakutsi oraindik. Datorren asteak bide beretik jarraituko du, eta tenperaturak 20 eta 30 ºC artean kokatuko dira. Ez da euririk espero, ezta egun erabat eguzkitsurik ere.
Gaur, erdi-mailako hodei eta goi-hodeiekin batera, urdinguneak agertuko dira; giro argia izango dugu goizean. Lehen orduetan, hegoaldeko haizea ibiliko da, eta eguerdi inguruan, haizeak mendebalde ipar-mendebaldera egingo du kostaldean; ondoren, barnealdera ere iristen joango da. Hortik aurrera, hodeitza trinkoagoa izango da zenbait momentutan, eta behe-hodeiak ere ager daitezke ipar partean. Hala ere, bustitzeko probabilitatea oso txikia izango da. Tenperaturak gora egingo du, eta 30 ºC-ra iritsiko da barnealdean; Nafarroa hegoaldean, 35 ºC-ra ere irits liteke. Kostaldean, berriz, 25 ºC inguruan geratuko da.
Astelehenean, fronte hotz baten eraginez, hodeiak ugaritu egingo dira. Goiza hego-mendebaldeko haizearekin eta tenperatura nahiko altuarekin hasiko dugu. Goiz amaieran, ordea, kostaldean, haizeak ipar-mendebaldera egingo du zakar, bolada gogorrekin, eta barnealdean aldatuko da ondoren. Freskatzera egingo du eta hodeiak ugarituko dira, batez ere behe-hodeiak iparraldean. Hegoaldean, argiago egongo da. Han eta hemen zaparrada batzuk egingo ditu, iparraldean ez ezik baita hegoaldean ere, eta arratsaldean ekaitzak jo dezake bertan. Tenperatura maximoetan ez da aldaketa handirik izango, baina freskatzera egingo du frontea pasa ostean.
Asteartean, giroak hobera egingo du berriro. Kantauri isurialdean, behe-hodei dezente izango ditugu, eta arratsaldetik aurrera gutxituz joango dira. Mediterraneo isurialdean, giro argiagoa izango da, goi-hodei batzuekin. Haizea ahul eta aldakor ibiliko da eta ipar-ekialdekoa gailenduko da arratsaldean. Tenperatura jaitsi egingo da.
Asteazkenean, tenperaturak igo egingo dira eta eguzkia nagusituko da, baina ostegunean lainoak ugaritu eta astebururako tenperaturak behera egitea eta zerua erabat iluntzea espero da.
Kontsulta ezazu eguraldiaren iragarpena, eta bidali zure argazkiak eta bideoak.
Albiste gehiago gizartea
Auto-ilara luzeak Txorierriko korridorean, 7 ibilgailuk talka egin ostean
Ezbeharra asteazken honetako goizeko zortziak baino lehen gertatu da, eta ez da inor zauritu, Eusko Jaurlaritzako Segurtasun Sailak jakinarazi duenez.
Adunako prostituzio-etxe bateko arduraduna atxilotu dute, sexu esplotazioa eta sexu eraso baten saiakera leporatuta
Lokaleko langileetako batek tratu umiliagarria jasan zuela eta drogak kontsumitzera behartu zutela salatu zuen, besteak beste.
Elkar argitaletxeak erabaki du Igartza bekarekin ez jarraitzea, CAFek Israelekin duen lotura dela eta
Saioa Alkaiza bertsolari eta idazleak sariari uko egin eta hamar egunera iritsi da Elkarren erabakia. “Palestinar herriaren kontra gauzatzen ari den genozidioan CAFek duen inplikazioa" salatu zuen sortzaile iruindarrak.
Donostian izandako azken sexu erasoa salatzeko bilkura egin dute hiriko udaletxe atarian
45 urteko gizon bat atxilotu dute joan den ostiralean emakume batek jasandako sexu-erasoaren egilea izatea egotzita. Emakumeak ertzain-etxean salatu zuenez, gizonak sexu-erasoa egiteaz gain, zer egiten zuen eta norekin zegoen kontrolatzen zuen, eta lagunak ikustea debekatzen zion.
Euskal Sagardoak 2025eko sagar-uzta aurkeztu du Altzon
Aurtengoa sagar urtea dela ziurtatu dute, eta azken urtean bildutako sagar kopurua bikoiztea espero dute. Iaz ez bezala, aurtengo sagar uztak itxura oso ona du.
Osakidetzak 48 urtera zabalduko du bularreko minbizia detektatzeko baheketa
Osakidetzako Protonterapia Unitate berriaren obrak bisitatu ditu Imanol Pradales lehendakariak, eta bertan egin du iragarpena.
Bilboko hilketagatik atxilotutakoak ez dira indarkeriazko taldeetako kideak, Ertzaintzako buruaren arabera
"Etxerako bidean elkar ezagutzen ez zuten bi gazte taldekoak ziren" hiru atxilotuak eta hildakoa. Dirudienez, elkarri irainka hasi ziren, eta azkenean liskarra gertatu zen. Ertzaintzaren buruak errefusatu du atxilotuek talde edo indarkeriazko taldeekin lotura dutenik.
Urolako eta Goierriko adingabeen odolean konposatu kimikoak daudela baieztatu dute
EHUren azterketa batek ondorioztatu du adin txikikoetan aurkitutako PFAS konposatu kimikoen mailek ez dutela arrisku larririk eragiten osasunerako, baina zaintza indartzeko premia ohartarazi du.
Espainiako Gobernua Gasteizko errefuxiatuen zentroaren edukiera murrizteko proposamenaren "bideragarritasuna" aztertzen ari da
Gobernuak Euskadin duen ordezkaria "bat dator" eta "ulertzen du" baliabide horretako plazak 350etik 200era murrizteko Maider Etxebarria Gasteizko alkateak egindako eskaera.
Bilbon lurreratzekoak ziren zazpi hegazkin beste aireportuetara bideratu behar izan dituzte, lainoagatik
Madriletik, Alacantetik, Basileatik, Bartzelonatik, Vienatik eta Paristik goizeko lehen orduko zetozen hegaldiak Santanderrera bideratu dituzte. Horietako bat Madrilera itzuli behar izan da, eta beste bat Zaragozara bidali dute. Loiuko aireportuan zabaldutako laino mardulagatik gertatu dira gorabeherak.