Gizon bat atxilotu dute Gasteizen, atxikita zuen bikotekide ohiari irainak eta sexu-erasoa egiteagatik

Emakumeak ageriko eraso zantzuak zituen aurpegian eta gorputzean, eta bikotekide ohiak gela batean giltzapetu zuela eta ez ziola etxetik ateratzen uzten esan du.

AGENTZIAK | EITB MEDIA

2024/08/02 - 17:54

Azken eguneratzea

2024/08/02 - 17:54

Ertzaintzak 34 urteko gizon bat atxilotu du Gasteizen, bikotekide ohiari irainak, tratu txarrak eta sexu-erasoa eragiteagatik. Gertakariak ostegunean izan ziren, 10:00ak aldera.

Gasteizko etxebizitza batean genero-indarkeriaren ustezko delitu bat izan zela jakin zuen Ertzaintzak, eta gizon batek, antza denez, atxikita zuela bikotekide ohia.

Bertaratu ziren agenteak etxebizitzara sartu ziren, eta biktimak adierazi zien bikotekide ohiak sexu-harremanak izatera behartu zuela, bere borondatearen aurka, eta iraindu eta eraso fisikoa egin ziola, Ertzaintzak ohar baten bidez jakinarazi duenez.

Emakumeak ageriko eraso zantzuak zituen aurpegian eta gorputzean, eta bikotekide ohiak gela batean giltzapetu zuela eta ez ziola etxetik ateratzen uzten esan zien agenteei.

Agenteek gernuz betetako bi ontzi aurkitu zituzten gela batean. Antza denez, gizonak utzi zizkion, premiarik izanez gero erabiltzeko. Atxilotua epailearen esku utzi dute ostiral honetan.

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta/edo deitu doako telefono hauetara: 900 840 111 (EAEkoa), 016 (Espainiako Estatukoa) edo 3919 (Iparraldekoa, eguneko 24 orduetan erabilgarri, igande eta jaiegunetan 09:00etatik 18:00etara izan ezik). Ez dute fakturan arrastorik uzten, baina bai telefonoan; beraz, ez ahaztu ezabatzea.