Haiekin-ek astoen aurkako "tratu txarrak" salatu ditu, Zallan animalia horiekin egindako bi lasterketatan

Haiekin elkarte animalistak Zallan astoekin egindako bi lasterketatan animalia horiei emandako "tratu txar krudela eta ilegala" kritikatu du, eta salaketa jarri du Bizkaiko Foru Aldundian eta Eusko Jaurlaritzako Joko eta Ikuskizun Zuzendaritzan.

Salaketekin batera, bi bideo eta hainbat argazki igorri dituzte, elkarte horren arabera, astoek jasaten dituzten "tratu txarrak" erakusten dituztenak.

Animalisten kolektiboak ohar baten bidez nabarmendu duenez, Euskal Autonomia Erkidegoko animaliak babesteko legea indarrean sartzearekin batera, "asto lasterketak debekatuta geratu ziren, debekatu egiten baititu animalien presentzia barne hartzen duten ikuskizun eta jolas-jarduera ibiltariak". Halaber, "debekatu egiten ditu bere garapen-araudiak ez dituzten animaliekin egiten diren ikuskizunak, eta lasterketa horiek ez dute halakorik".

Haiekin elkarteak azaldu duenez, bestalde, "kontuan hartu behar dira horrelako ekitaldien eraginak". "Astoek ez dute korrika egiteko joerarik, asko jota trostan joaten dira, baina ez galopan; beraz, asto-lasterketak deiturikoetan, oro har, horien egoera fisikoaren kontrako gehiegikeria egiten da, eta animalia horiek beren etologia urratzen duten ekintzak eta portaerak egitera behartzen dira", azaldu dute.

Hain zuzen ere, lasterketetako batean "astoak korrika egiteko kolpatzen dituztela ikus daiteke, asto bat eta zaldi bat isatsekin lotuta beste asto bati".

"Ez da bakarrik ezin dutela isatsa mugitu, baizik eta lotura horrek beste animalia baten mugikortasunean ere eragiten duela. Zaldien buztanak nerbio-bukaerak ditu eta funtsezko funtzioak betetzen ditu, bai animalien komunikazioan, bai ongizatean, baina, gainera, isatsa bizkarrezurraren zati bat da, gizakiekin gertatzen den bezala, nerbio-sistema zentrala babesteko funtzioa betetzen duena. Hau da, bizkarrezurreko lesio batek ondorio larriak dakartza", gaitzetsi du.

Salatutako bigarren lasterketari dagokionez, hainbat lagunek, "kolpe, bultzada eta oihuz betetako basakeria erakustaldi batean, astoak atzeraka ibiltzera behartzen dituzte".

"Ekintza horrek lesioak eragin ahal izan die animaliei, baita muturreko izua ere, harpe-gizaki talde batek astinduta ikustean bere burua. Horri guztiari gehitu behar zaio jai-giroak, oihuek eta jasotzen dituzten kolpeek larritasuna eta sufrimendua eragiten dietela, eta horrek geldiarazi egiten dituela. Ondorioz, are gehiago kolpatzen dituzte, korrika egitera behartzeko", adierazi du.

Haiekinek tamalgarri deritzo, "haurrak horrelako ekintza higuingarrietan heztea, non dibertitzeko, astoak bezalako izaki babesgabeak eta nobleak menperatu, kolpatu eta behartu behar diren, eta non animalia horien aurkako abusu, umiliazio eta tratu txarren adierazpen groteskoa ospakizun kolektibo bihurtzen den".