Espetxera bidali dute Donostian emakume bati sexu-erasoa egiteagatik bart atxilotutako gizona

Ertzaintzak 26 urteko gizon bat atxilotu zuen atzo Donostian, ostegun gauean emakume bati sexu-erasoa egitea egotzita, eta gaur kartzelan sartu dute, epailearen aurretik igaro ostean.

22:00ak aldera gertatu zen erasoa, Intxaurrondo auzoan. Emakumea kaletik oinez zihoala, erasotzaileak labana batekin mehatxatu zuen eta sexu-erasoa egin zion.

Etxera iristean, erasoa jasan zuela kontatu zion emakumeak familiari, eta sexu-erasoen biktimei aplikatzen zaien protokoloa jarri zuen abian Ertzaintzak.

Ikerketa ere abiatu zuten, eta ostiral arratsaldean atxilotu zuten erasotzailea. Gaur goizean, berriz, epailearen aurrean deklaratu du, eta kartzelatzeko agindua eman du horrek.