Complutense Unibertsitateak ikerketa ireki dio Monederori sexu-jazarpen salaketa batengatik

Madrilgo Complutense Unibertsitateak Juan Carlos Monedero Podemoseko sortzaileetako bati eta Zientzia Politikoen Fakultateko irakasleari ikerketa ireki dio, sexu-jazarpen salaketa bat jaso ondoren, Europa Pressek baieztatu ahal izan duenez.

Albiste-agentzia honek kontsultatutako iturriek zehaztu dute Monederori dagokion informazio espedientea zabaldu diote, baina ez dute xehetasun gehiagorik eman, konfidentziala den prozesu bat baita.

Hain zuzen ere, gaur Podemosek jakitera eman du Monedero koaliziotik baztertu zutela 2023ko irailean, sexu indarkeria egotzita haren kontrako bi emakumeren testigantzak jaso zituelako.

Koalizio morearen arabera, garai hartan Podemosen Feminismoen Idazkaritzak emakume baten mezu elektronikoa jaso zuen. Zioenez, Monederok erasoa izan zitekeena egin zion, eta barne ikerketa eskatu zion alderdiari.

Salaketa Berme Batzordera helarazi zuten orduan, eta horrek testigantza zehatzagoa emateko bide "konfidentzial eta segurua" opatu zion emakumeari. Horrek, baina, ez omen zuen erantzun.

Sasoi berean, alderdiko zuzendaritzako hainbat kidek beste emakume baten lekukotzaren berri izan zuten. Horrek ere sexu indarkeria salatu zuen eta alderdiko ekitaldietatik baztertzeko eskatu.

Bi salaketak mahai gainean, Podemosek adierazi du "lehen unetik" jardun zuela, eta Monedero alderdiko ekintzetara deitzeari utzi ziola. Aurrez, 2015ean, zuzendaritzako kide izateari utzi zion politikaria, eta 2023ko maiatzean, alderdiko Errepublika eta Demokrazia institutuko presidentetzari uko egin zion.

Monedero: "Jazarpena da"

Telegram sare sozialean duen profilean eskegitako mezu batean, politologo eta Podemosen sortzaileak errugabea dela aldarrikatu du eta "jazarpenaren" biktima dela salatu.

"Julian Assangeren garaitik dakigu akusazio batzuk oso eraginkorrak direla. Errugabetasun presuntzioa desagertzen da, eta akusatuari dagokio erruduna ez dela frogatzea. Jazarpenaren parte da hori, ez jokabide zuzen batena", nabarmendu du.

Monederoren esanetan, "kasualitatea da gero (Podemosen aurkako) epaiketa zital guztiak amaitu diren honetan, berriro gure kontra hastea. Podemos inkestetan gora egiten ari denean gertatzen ari da guztia: ez dakit zerikusirik ote duen, baina hala uste dut. Ez zait onargarria iruditzen".

Nabarmendu duenez, "Bakarrik bai da bai" kontzeptuaren defendatzailea da, kontsentimenduarena, eta harremanetan muga "oso argiak" ezartzearen aldekoa. "Oraindik ere asko dut ikasteko" feminismoaz eta "harremanetan agertu beharreko enpatiaz".

Azkenik, azpimarratu duenez, "zorionez, delituak Legeak ezartzen ditu" eta "edozein harreman ezin daiteke susmopean jarri, eta edozein jarrera ez da delitu".