Bruselak Meloniren deportazio-eredua imitatzeko legedia ezar dezan proposatu die Europako gobernuei

Ursula von der Leyen Europako Batzordearen presidenteak Italiako Gobernuaren eredua jarraitzeko araudia proposatu die Europako gobernuei, deportazio zentroak Europar Batasunetik kanpo kokatzeko. Hala ere, Bruselak marra gorri bat ezarri du, eta pertsona migratzaileak ezin izango dira EBtik kanpo izango diren zentro horietara eraman, behin betiko kanporatzeko agindua eman arte.

"Gure planteamenduan irmoak izan behar dugu, Europako justiziaren eta oinarrizko eskubideen balioei leial izateari utzi gabe", defendatu du Henna Virkkunen Segurtasun eta Demokraziako presidenteordeak, Bruselaren proposamenaren xehetasunak aurkeztean.

Von der Leyenek abenduan agindu zien EBko estatuburuei eta gobernuburuei Italiako eredua "esparru juridikoan sartzeko modurik onena" bilatuko zutela deportazio zentroak Europar Batasunetik kanpo kokatzeko, "aldi berean oinarrizko eskubideak errespetatuz".

Formatu hori pertsona migratzaileen kanporatzeak bizkortzeko "irtenbide berritzaile" gisa defendatu zuten estatu kide gehienek orduan, baina Espainia bezalako batzuek argi utzi zuten ez dutela aukera hori begi onez ikusten, haren eraginkortasunari eta legezkotasunari buruzko zalantzengatik.

Testuinguru horretan, Bruselak hainbat marra gorri ezarri ditu Melonik Albaniarekin adostutako eredutik bereizteko saiakeran. Italiako Justiziak behin baino gehiagotan geldiarazi du Gobernu ultraeskuindarraren prozedura, itsas zabalean erreskatatu berri diren pertsona migratzaileak zentro horietara eramateagatik, asilo-eskaerak izapidetu gabe.

Proposamen horrekin, Batzordeak 2008ko Itzuleren zuzentaraua aldatu nahi du. Araudi hori zaharkitua dagoela uste du, Europar Batasunera legez iristen ez diren eta errefuxiatu edo asiloa lortzen ez duten pertsona migratzaileen kanporatzeak azkartzeko.

Europako Batzordeak bere proposamena defendatu du, "funtsezko" oinarria baita gobernuek 2026an aplikatu behar duten Migrazio eta Asilo Itunak funtzionatzen duela bermatzeko.