Zea Maysek, Leire Martinezek, OBK taldeak eta Rozalenek jarriko diote soinu banda 2025eko sanferminei

2025eko sanferminek badute soinu banda. Bi hilabete baino gutxiago falta dira Iruñean festa lehertzeko, eta, aurten ere, musika Nafarroako hiriburuko kaleetara itzuliko da jaiak irauten duen bitartean, hau da, uztailaren 6tik 13ra. Udalak astearte honetan jakinarazi du Gazteluko plazako kontzertuen kartela.

Hala, aurtengo San Fermin jaietara gerturatzen direnek, besteak beste, pop-rock estiloko emanaldiez gozatu ahal izango dute Rozalen, OBK eta Leire Martinezekin, baita indie-pop, electro-pop, punk eta hip hop estiloko musikaz ere, Ladilla Rusa, Kaotiko eta Villano Antillanoren eskutik. Bulego, Tatxers, Zea Mays, Dupla, Cali eta El Dandee, Sara Socas eta Lia Kaliren emanaldiak ere izango dira aurtengo sanferminetan.

Udalak adierazi duenez, emakumeek osatutako taldeen eta euskarazko musikaren aldeko apustua egin dute. Izan ere, Gazteluko plazako agertokirako hautatutako artista guztietatik zazpi emakumeak dira (% 54) eta lauk euskaraz abesten dute (% 31).

Kontzertuak 23:45ean hasiko dira, su artifizialen ondotik, eta narbarmentzekoa da bost egunetan bi kontzertu izango direla oholtza gainean, bigarrena goizaldeko ordu batean. Larunbatean, bestalde, lehenengo kontzertua 22:00etan hasiko da, eta, bigarrena, 23:45ean.

Sanferminetako lehenengo egunean, uztailaren 6an, Bulego taldearen emanaldiaz gozatzeko aukera izango dute bertaratutakoek, eta, hurrengo egunean, hilaren 7an, Tatxers eta Kaotiko taldeak arituko dira taula gainean.

Asteartean, hilak 8, Gazteluko plazak Rozalen hartuko du, eta egun bat geroago, uztailaren 9an, Leire Martinezen txanda izango da. Sanferminetako erdiko egunean, uztailaren 10ean, osteguna, bi kontzertu izango dira: Gaua OBK taldeak irekiko du eta Ladilla Rusak hartuko du lekukoa, eta bere elektro-pop soinuak eta letra sarkastiko eta ganberroak botako ditu.

Ostiralean ere bi emanaldi izango dira. Lehenik eta behin, Aguraingo Dupla bikotea igoko da agertokira, eta, ondoren, Zea Mays rock taldearen txanda izango da. Larunbateko hitzordu musikalak ordutegi berezia izango du, 22:00etan hasiko Sara Socasen emanaldia, eta 23:45ean, Cali eta El Dandee taldeen erritmoan bizituko da Gazteluko plaza, pop latinoko bikote arrakastatsuenetako baten eskutik.

Azken egunean, hilaren 13an, igandea, egungo artista urbano esanguratsuenetako bi elkartuko dira. Lehenik eta behin, Villano Antillano igoko da agertokira, eta Lia Kali abeslari eta konpositore bartzelonarrak emango dio amaiera aurtengo sanferminetako musika-eskaintzari.

Musika elektronikoa, country psikodelikoa eta Saharako rock musika, Compañia plazan.

Compania plazak ere eskaintza zabala du aurten. Hilaren 6an, Zombies in Miami dance elektronikako bikotea izango da kartelburu, eta Adrien Body eta Rapha Mundi ere arituko dira bertan.

Mundu mailako erreferenteak ere izango dira, hala nola Omar Souleyman, musika elektroniko arabiarraren ikurra, edo Seun Kuti & Egypt 80, Fela Kutiren semerik ezagunena.

Horiez gain, Iruñean Chocolate Rmx ere izango da, baita Mystery Lights, Bcuc, eta Eri Yamamoto, jazz klasikoaren erreferentea.

Arratsaldeko egitarauak bertako artistak hartuko ditu batik bat, Nafarroako talde esanguratsuenetako batzuk igoko baitira taula gainera. Adibidez, Janus Lester, Kiliki eta Kokoshca eta Bourbon Kings beteranoak.