Europa Ligako finala Bilbon: Zer eragin izan du trafikoan eta garraio publikoan?

Bilbon jokatzekoa den Europa Liga txapelketako finalak hainbat gorabehera eragin ditu trafikoan, garraio publikoan eta zabor-bilketan. Ondoriook San Mames inguruan igarri dira jada batik bat, baina, oro har, Basurtu, Indautxu eta Olabeaga auzoetan nabaritzen ari dira herritarrak. 09:00etan Sabino Aranarako sarbidea itxi dute.

Hori horrela, San Mames inguruan egingo da trafiko-eten luzeena, maiatzaren 21eko 00:00etatik maiatzaren 22ko (osteguna) 05:00etara. Horretarako, hesiak jarriko dituzte Sabino Arana etorbidean, Jesusen Bihotzaren eta Simon Bolivar kaleen artean. Estadioaren perimetroa ere itxiko dute, Felipe Serrate, Ventosa bidea, Luis Briñas eta Zunzunegui etorbidearen artean.   

09:00etatik aurrera, gutxi gorabehera, itxita egongo da Sabino Aranako A8rako irteera, Urkixo zumarkaletik. 14:00etan, inguru hauetan etengo da trafikoa: Euskalduna zubian, Jesusen Bihotzaren plazan, Kale Nagusian (Maria Diaz de Haro kaleraino) eta Jose Maria Escuza kalean. Halaber, zirkulazioa aldizka etengo da Trenbide etorbidean, Sabino Aranaren eta Ametzolako biribilgunearen artean.

Gainera, Ertzaintzak trafikoa etengo du Zunzunegi etorbidean, A-8 autobidetik Bilborako sarbidean, hilaren 21eko 17:30etik aurrera. Beraz, hirira sartu nahi duten ibilgailu partikularrek sarrera Juan de Garay, Enekuri, Miraflores, Santo Domingo eta Artxandako tuneletatik egin beharko dute.

Aparkalekuak hilaren 22ra bitartean kenduko dira kale horietan, baita Basurtuko Kaputxinoen kalean, Autonomian, Hurtado Ametzagan eta Zunzunegui kalean ere bai.

Gainera, kale horietan dauden garajeetan ezin izango da sartu ez irten hilaren 21eko 15:00etatik hilaren 22ko 05:00etara, Udaltzaingoak baimena ematen duen kasuetan izan ezik.

Ordutegi horretan, Basurtu, Indautxu eta Olabeagan sartzeko eta irteteko, Autonomia, Zabalburu eta Juan de Garay kaleak erabili ahalko dira, alde batetik, eta, Basurtu-Kastrexana errepidea eta Kadaguako korridorea, bestetik. Bizilagunak larrialdi atzeraezinak dituztenean bakarrik sartu ahalko dira auzo horietan.

San Mamesetik gertu dauden etxebizitzetara, hau da, futbol-zelaiko segurtasun-eraztunen barruan dauden etxebizitzetara, hiru bidetatik iritsi ahalko dira oinezkoak:

- Sabino Aranatik, Jesusen Bihotza plazan eta Zunzunegui etorbideko izkinan, tranbiaren paraleloan dagoen espaloitik.

- Luis Briñasetik, zenbaki bakoitietako espaloitik.

- Ventosa bideko etxebizitzetara, oinezkoen sarbidea kale horren eta Trokabidearen artean egongo da.

Ametzola, Tottenhameko zaleen topagunea

Fan Meeting Point guneetako bat, zehazki Tottenhamen zaleak hartuko dituena, Ametzolan kokatuko da.

Hala, igandera arte, desmuntaketaren amaiera egunera arte, Trenbidearen etorbidea okupatuko da geltokiko biribilgunetik kalearen amaieraraino, baita inguruko oinezkoentzako eremuak ere. 

Ondorioz, maiatzaren 24ra arte (larunbata), hainbat aparkaleku okupatuko dituzte Trenbideko etorbidean (azken zatian), baita Santiago Brouard (Ugalde eta Trenbide etorbidearen tartean), Ugalde (5 plaza) eta Maria Victoria Uribe Laso (2 plaza) kaleetan ere.

Autonomia kalean —atari bakoitien aldean— ere ezin izango da aparkatu hilaren 21eko 10:00etatik hilaren 22ko 14:00etara, zehazki Gordoniz eta Concha Jeneralaren kaleen arteko tartean (batez ere Tottenhamen zaleak aireportutik ekartzen eta bertara eramaten dituzten autobusentzat erreserbatua).

Atari bikoitien aldean, berriz, Gordoniz eta Concha Jeneralaren kaleen arteko tartean, ezin izango da aparkatu maiatzaren 20ko 22:00etatik aurrera.

Inguru horretako trafiko-eten handiena ostiralean (maiatzak 23) bukatuko da, 12:00etan. Tarte horretan, ezingo da zirkulatu Trenbideko etorbidean zehar, zehazki, Gordoniz eta Santiago Brouard kaleen artean.

Perimetroko atarietan bizi diren pertsonak oinezkoentzako korridore batetik sartuko dira etxera; garajeetan sartzeko eta/edo irteteko, berriz, Ugalde kalea eta horretarako prestatutako eremua erabiliko dira.

Manchester Uniteden zaleak, Etxebarria Parkean

Manchester Uniteden zaleak beste Fan Meeting Point batean bilduko dira, Etxebarria parkean. Parke horren eremu zabal bat okupatuta geratuko da ostegunera arte.

Tximiniaren ondoko haur-parkea ezin izango da erabili, eta oinezko pasabide bat jarriko da Gas plazatik (Quintana kalea) eta parkeko sarbidetik.

Finalaren eguneko 00:00etatik hurrengo eguneko 14:00etara (osteguna), Begoñako Basilikako aparkalekua okupatuko da, bai eta Zumalakarregi etorbideko eta Begoñako Andra Maria inguruko aparkalekuak ere, autobusak aparkatzeko.

Geroago, asteazkenean, hilak 21, 09:00etatik aurrera, Zumalakarregi etorbidean zirkulazio-errei bat okupatuko da, Guridi Musikariaren biribilgunetik Begoñako tuneletaraino, autobusek aparkatzeko.

Horregatik, hilaren 21eko 22:00etatik aurrera, Manchester Uniteden zale guztiek autobusetan alde egin arte, itxita egongo da Zumalakarregi etorbidea (San Agustin biribilgunearen eta Guridi Musikariaren biribilgunearen artean).

Areatzan, Fan Festival jaia

Areatzak eta Arriaga plazak ere izango dute protagonismoa finala jokatzen denean, bertan antolatuko baita Europa Ligako Fan Festival jaia, maiatzaren 20an eta 21ean.

Horrek esan nahi du balitekeela aldaketak egotea oinezkoen eta ibilgailuen zirkulazioan ingurune horretan, zenbat jende pilatzen den.

Maiatzaren 21ean, 12:00etatik 14:00etara, gutxi gorabehera, ibilgailuen zirkulazioa eten egingo da Mesedeetako zubiaren, Areatzako zubiaren eta Ernesto Erkoreka plazaren arteko eremuan.

Asteazkenean eta ostegunean aparkaleku-erreserbak egingo dira Zingira eta Bailen kaleetan eta hiriko beste eremu batzuetan, hala nola Botikazar erriberan (Iruña eta Rafaela Ibarra kaleen artean).

Halaber, Euskalduna Zubian ibilgailuen zirkulazioa etengo da hilaren 21eko (asteazkena) 14:00etatik hilaren 22ko (osteguna) 02:00ak arte.

Bestalde, Bilborako A-8 autobideko sarbidea, Zunzunegui etorbidetik, kolokan egongo da Ertzaintzak hilaren 21eko 15:00etatik aurrera itxi egingo baitute. Hala, ibilgailu partikularrak Juan de Garay, Enekuri, Miraflores eta Agirletatik sartu beharko lirateke.

Aldaketak garraio publikoan

Oro har, autoa ez erabiltzea eta garraio publikoa erabiltzea aholkatu du Udalak. Ingurutik pasatzen diren Bilbobus eta Bizkaibus linea gehienen ibilbideak eta geralekuak kendu edo aldatu egingo dira. Informazio hori kontsultatzeko, jo Bilbobusen webgunera edo deitu 010 telefono zenbakira.

Bestetik, metro, tren eta tranbia zerbitzuak indartu egingo dituzte.

Bilboko metroa goizeko 05:55etik 23:02ra arte ibiliko da; trenek 7,5 minutuko maiztasunarekin zirkulatuko dute —ohiko ordutegian—, eta ordu-tarte batzuetan zerbitzua indartu egingo da, adibidez, 13:50etik 14:30era. Denbora horretan, maiztasunak 2:30 eta 5 minutu bitartekoak izango dira. Metroak 3:00etan utziko dio zerbitzua emateari.

Kontuan izan behar da San Mameseko geltokia itxita egongo dela hilaren 21eko 15:00etatik hilaren 22ko 06:00etara.

Ordu horretatik aurrera, tranbiak ez du zirkulatuko Euskalduna eta La Casilla artean. Hala ere, zerbitzua indartu egingo da partidaren aurreko orduetan, baita partidan zehar eta hurrengo orduetan ere. 

Renferen aldiriko trenei dagokienez, Ametzola eta Autonomiako geltokiak itxita egongo dira hilaren 21eko 09:30etik 22ko osteguneko 09:00etara. Olabeaga eta San Mameseko geltokiak maiatzaren 21eko 15:00etatik aurrera itxiko dira.

TAOari dagokionez, asteleheneko (hilak 19) 09:00etatik larunbateko (hilak 24) 14:00etara, zerbitzuak egoiliarren eremuak aldatuko ditu, DES-R egoiliarren bereizgarria duten pertsonek hiriko edozein sektore berdetan aparkatzeko aukera izan dezaten.

Segurtasuna

San Mamesen sartzeko, hiru segurtasun eraztun ezarriko dituzte, sarbideak kontrolazeko, eta partida ikusteko sarrera duten pertsonak baino ezingo dira sartu eremu horretara.

Pertsona horiek perimetro mugatuaren barruan dauden taberna, jatetxe eta saltokietara sartu ahal izango dira. Taberna, jatetxe eta saltoki horiek egun guztian egongo dira irekita.