Europa Ligako finalerako UEFAk antolatutako 'fan zone' neutrala hartuko du Bilboko Areatzak

Manchester United eta Tottenham Hotspur taldeek hilaren 21ean San Mamesen jokatuko duten Europa Ligako finaleko zaleen gunea hartuko du Bilboko Areatzak, Bizkaiko hiriburuko toki sinboliko eta ezagunenetako batek.

UEFAk antolatutako 'fan zone' hori asteazken honetan hasiko dira prestatzen. Doako sarrera izango duen "eremu neutrala" izango da, esparrua bete arte. Asteartean, hilaren 20an, 11:00etatik 22:00etara egongo da zabalik, eta asteazkenean, hilaren 21ean, 11:00etatik 18:00etara.

Ekitaldiaren aurkezpenean, finala bultzatu duten —Eusko Jaurlaritzak, Bizkaiko Foru Aldundiak eta Bilboko Udalak— herritarrei dei egin diete "jai giroan kirol-ekitaldi historikoaren aurreko orduetan parte hartzera".

Hainbat jarduera egingo dituzte, hala nola UEFA Europa Leagueko garaikur ofiziala tokian bertan ikusi eta argazkiak ateratzea, bi talde finalisten kamiseta ofizialak ikustea, futbol-desafioetan parte hartzea eta garaikur erraldoiarekin eta finaleko aulkiekin argazkiak ateratzea.

Era berean, DJ Mimolocoren zuzeneko musikaz gozatzeko aukera izango da, UEFAren denda ofiziala bisitatu (artikulu eta oroigarri esklusiboak eskuratzeko) eta giroaz gozatzeko moduko giro aparta izango da, Kresala musika taldearen eta Sama Siku fanfarrearen eskutik; gainera, entretenimendu paregabea egongo da esparru osoan, besteak beste, herri kirolen erakustaldiak egingo baitira.

Futbolari profesional ohien arteko norgehiagoka

Egitarauan futbolari profesional ohien artean egingo duten partida ere da nabarmentzekoa, zelai txikian jokatuko da, hilaren 21ean, eguerdian, Arriaga Antzokiko plazan, UEFAk hautatutako talde baten eta Euskadiko Futbol Federazioak osatutakoaren artean.

Azken hori Euskal Selekzioan jokatu eta Europa Ligan parte hartu duten zazpi jokalari ohik osatuko dute: Mikel Balenziaga, Beñat Etxebarria, Gorka Iraizoz, Carlos Martinez, Xabi Prieto, Markel Susaeta eta Gaizka Toquero. Erakundeen ordezkariak eta Aritz Aduriz Europa Leagueko UEFAko enbaxadorea ere bertan izango dira.

Baterako 'fan zone' hori alde batera utzita, taldeen jarraitzaileen bilguneak Ametzolan, Tottenham taldekoentzat, eta Etxebarria parkean, Manchester Uniteden kasuan, egongo dira.