35 ºC arteko tenperaturak neurtu dituzte bero-boladaren lehen egunean

Iragarritako bero handia ostegun honetan iritsi da Euskadira eta Nafarroara. Tenperatura maximoak 30 ºC-tik gorakoak izan dira gaur barnealdeko hainbat tokitan, eta egoera berezia izan da; izan ere, hegoaldetik aire beroa sartu da. Euskalmet Euskal Meteorologia Agentziak iragarri duenez, gaur, maiatzak 29, eta bihar, ostirala, tenperaturak nabarmen egingo du gora.

Horrez gain, Estatuko Meteorologia Agentziak (AEMET) abisu horia ezarri du Nafarroan, tenperatura altuek eragin dezaketen arriskua dela eta, batez ere Nafarroa hegoaldean.

Eguneko tenperatura beroenak Bizkaiko eta Arabako mendebaldean neurtu dituzte. Sopuerta, Zalla, Laudio eta Amurrioko estazio meteorologikoetan 35 ºC-ak gainditu dituzte arratsaldean. Dena dela, Gasteiz maiatzeko errekorra gainditzetik gradu batera geratu da, eta Bilbo, bira.

Gipuzkoa eta Bizkaiko barneko eskualdeetan eta Nafarroan ere bero egin du. Tenperatura altuenak 30 ºC-tik gorakoak izan dira orokorrean. Eta Erriberan, Tuteran, esaterako, 34 ºC-ak gainditu dituzte.

Giro epel eta goxoena kostaldean izan da, brisa sartu eta termometroei galga jarri baitie. Adibide bat jartzearren, Bermeoko Almike meteorologia estazioan 24,4 ºC-koa izan da gaur hozbero altuena, arratsaldeko 18:00ak aldera hartutakoa.

Gaua ere beroa izango da bailara askotan, ez ohikoa, maiatzean gaudela kontuan izanda.

Bihar, ostirala, beroak jarraituko du, baina arratsaldean hodeiak ugaritu egingo dira, eta baliteke zaparrada trumoitsuak botatzea. Tenperatura altuak izango ditugu, baina baliteke gaur baino zertxobait baxuagoak izatea.

Agintariek azpimarratu dute oso garrantzitsua dela neurriak hartzea, eguerdian eguzkitan ez egotea, behar bezala hidratatzea eta meteorologia eta babes zibileko zerbitzu ofizialen gomendioak jarraitzea.

Larunbatean, maiatzaren 31n, tenperaturak zertxobait jaitsiko dira. Kantauri isurialdean behe-hodei ugari izango dira, baina eguerdi eta arratsalde partean zerua zertxobait irekiko da. Araba eta Nafarroa hegoaldean eguzkia nagusituko da. Arratsaldean, zaparrada trumoitsuak bota ditzake, batez ere barnealdean. Tenperatura maximoak 23-24 ºC ingurukoak izango dira kostaldean, eta barnealdean 30 ºC inguruan jarraituko dute, ipar eta ipar-mendebaldeko haizearekin.