Bizkaibusek eskaripeko zerbitzua ezarriko du landa-eremuetan 2026tik aurrera

Bizkaiko Foru Aldundiak Bizkaibusen irudi berria aurkeztu du, eta iragarri du hiriarteko zerbitzuan egiturazko eraldaketa egingo dela: lineak berrantolatuko dira, autobus elektrikoak sartuko dira eta landa eremuetan eskaripeko garraioa zabalduko da. Ekimenaren helburua da hiriarteko garraio publikoa gizartearen, ekonomiaren eta ingurumenaren eskaera berrietara egokitzea.

Nobedade nagusienetako bat da eskaripeko garraioa landa-eskualdeetan progresiboki ezarri asmo dutela.

Eskaripeko garraioaren proiektu pilotu batekin hasiko da, Busturialdean, ekainaren 21etik aurrera, eta lehen fasean "anplitudearen eta ibilbidearen hobekuntza, maiztasun gehiago eta geltoki gehiago" ezartzea aurreikusten du. Lotune zentroa Gernikan egongo da. Ibilbide berriak lehendik dauden lineetan oinarrituko dira, baina zabalagoak izango dira.

Lehenengo egitura pilotu hori udan eta "udazkeneko hilabete batzuetan" egongo da aktibo, erabiltzaileen erabilera-datuak zein gehien eskatutako ibilbideak biltzeko. Irailetik aurrera prozesu parte-hartzaile bat zabalduko dute, eskualdeek landa eremuetako bizilagunen demografia eta beharren datuekin beteko duten galdetegi batekin. Guztira, 13 udalek hartuko dute parte proba pilotuan.

Erabiltzaileek zehaztuko dute, aplikazio baten bidez, nora eta noiz joan behar duten; horrela, ibilbideak eskarira egokituko dira eta geltokia etxetik ahalik eta gertuen egongo da. Algoritmo batek ahalik eta konexio onena egingo du.

2026an Busturialderako zerbitzua erabat aktibo egongo da, erabiltzaileen eskaera-datuak eta zerbitzuaren ibilbideak eta aukerak aurrez aurre jarri ondoren, eta pixkanaka Enkarterri, Lea-Artibai, Arratia eta Mungialdera zabalduko da.

Aldi berean, Bizkaibusek bere flota erabat modernizatuko du, eta 142 autobus berri izango ditu 2027ra bitarte; horietatik 21 elektrikoak izango dira. Gainera, horiek kargatzeko azpiegitura espezifiko bat garatuko da (Aparkabisako elektrifikazioa, kasu), eta geltokian kamera termikoak instalatuko dira, baita bateriekin gerta litezkeen gorabeherei aurre egiteko esku-hartze azkarreko sistema bat ere, segurtasun-estandarrak indartzeko.

Garraio, Mugikortasun eta Turismoko foru diputatu Sonia Perez Ezquerrak nabarmendu du aldaketa horiek eraldaketa sakon baten parte direla, eta markesinetan, autobusetan eta kanal digitaletan dagoeneko ikus daitekeen identitate bisual berri bati erantzuten diotela. Sarearen berrantolaketari esker, halaber, urtean 700.000 kilometro baino gehiago murriztuko da zirkulazioa Bilbon, eta, hala, zerbitzuak indartuko dira lurraldeko beste eremu batzuetan.

Azkenik, aginte-postu bateratua sortzea aurreikusi da, sistemaren koordinazioa eta segurtasuna hobetzeko.