Eraso sexisten kontra, gelditu egin dira Iruñea eta sanferminak
Ehunka pertsonek erantzun diote hainbat kolektibo biltzen dituen Indarkeria Sexistaren aurkako Emakumeen Plataformak egindako deialdiari eta Gazteluko plazara joan dira jaietan gertatu diren eraso sexistak salatzeko. Iruñeko Udaleko Bozeramaileen Batzordeak adierazpen bat onartu du igande honetan, hilaren 11ko sexu-erasoaren "erabateko gaitzespena" agertuz.
Iruñeko Gaztelu plaza, igande arratseko elkarretaratzean. EFE.
Sanferminen ospakizunak geldiarazi dute minutu batzuetan gaur Iruñean eta ehunka lagun elkartu dira Gazteluko plazan, azken egunotan izandako eraso sexistak salatzeko -horietako bat "intentsitate handikoa"-, eta "eraso matxistarik gabeko" jaiak eskatzeko.
Gaur arratsaldean izan da bilkura, Iruñeko erdigunean, Gazteluko Plazako agertokian. Eta gauero milaka lagun kontzertuetan alai gozatzen ikusi ohi den tokian bertan, bestelakoa izan da gaur arratsean irudia. Aurpegi serioak, minarenak, asperdurarenak, haserrearenak. Denak ere hainbat plataforma biltzen dituen Indarkeria Sexistaren aurkako Emakumeen Plataformaren deialdiari elkarrekin eta ozen erantzuteko.
Plataformako ordezkari talde batek bi pankarta erakutsi ditu oholtza gainean, zeinetan euskaraz eta gaztelaniaz "No a la violencia contra las mujeres" eta "Eraso sexistarik ez" irakur zitekeen, azken hori Iruñeko Peñen Federazioak sinatua.
Eszenatokiaren azpian, jendez gainezka zegoen plaza, besteak beste, zezenketatik gaur isiltasunean atera diren sanferminetako peñak, ehunka eta ehunka herritar, eta UPN, PSN, EH Bildun dituzten karguengatik ezagunak diren beste hainbat, baita Alicia Echeverria Espainiako Gobernuak Nafarroan duen ordezkaria ere, Estrella Lamadrid Emakumearen aurkako Indarkeriaren aurkako Koordinazio Unitateko zuzendariarekin.
Horien guztien aurrean, Ana Carmonak gaztelaniaz eta Amaia Zubietak euskaraz, ohar bat irakurri dute, eta bertan adierazi dutenez sanferminetako 8 egunetan "intentsitate handiko eraso baten" eta "intentsitate baxuko zortzi erasoren" berri izan dute, "baina badakigu askoz gehiago izan direla".
"Emakumeen aurkako sexu-indarkeria jai-guneetan gertatzen dela salatu nahi dugu, baina ez horietan bakarrik, egunero gertatzen zaigun zerbait da, gure etxeetan, gure lanetan, eskoletan, gure koadriletan, gure aisialdi-lekuetan...", deitoratu dute.
Horren aurrean, "emakumeek sanferminez nahi bezala gozatzeko eskubidea" dutela aldarrikatu dute, "indarkeriarik gabeko bizitza bizitzeko eskubidea" duten bezala. "Zuek gizonok egiten duzuen bezala bizi nahi dugu, beldurrik gabe, gure hitza zalantzan jarri gabe, baldintzatuak izan gabe, aske izan nahi dugu".
Hala, zera esan diete, zehazki, gizonei: "Guk ez dizuegu erasorik egiten, guk ez zaituztegu epaitzen, guk bizitzen uzten dizuegu. Ikas ezazue zuek ere, eta, bestela, gera zaitezte etxean".
Horrez gain, Administrazio Publikoei "baliabide espezializatuak, diziplina anitzekoak eta aurrekontu-zuzkidura nahikoak" eskatu dizkiete, "arreta eskatzen duten emakumeei laguntzeko eta arreta emateko".
Udalaren gaitzespena
Iruñeko Udaleko Bozeramaileen Batzordeak adierazpen bat onartu du igande honetan, hilaren 11n emakume batek jarritako sexu-eraso baten salaketaren aurrean. Udaleko talde politiko guztiek "erabateko gaitzespena" agertu dute.
Testuan, Batzordeak "erabateko babesa eta elkartasuna" adierazi die emakumeari eta haren inguruari, eta "errespetu osoa" adierazi die "haien eskubideak eta intimitatea babesteko". "Gure koordinazio eta erantzun protokoloa betez, berriro ere berresten dugu gure hirian gertatzen den edozein eraso, indarkeria edo jarrera sexista arbuiatzen eta gaitzesten dugula, eta lanean jarraitzeko konpromisoa hartzen dugu sexu-erasoak desagerrarazteko, segurtasuna hobetzeko eta edozien motatako inguruneetan emakumeen askatasun osoa bermatzeko", gaineratu du.
Udal taldeek gizarteari eskatu diote alda dezala "erasotzailea babesten duen eta emakumeak erruduntzat jotzen dituen eredu kulturala", eta gizonei eskatzen diete "konpromiso aktiboa har dezatela emakumeek jasaten dituzten eraso eta indarkeria mota guztiekin amaitzeko eta gure gizartean benetako berdintasuna lortzeko lan egiteko".
Gainera, "indarkeria eta eraso sexisten aurrean aktiboki jokatzeko" deia egin diete herritarrei, eta "emakumeek beren harremanei, gorputzari eta sexualitateari buruz erabakitzeko duten eskubidea" azpimarratu dute. "Eraso sexisten aurkako borrokarekin dugun konpromiso irmoa berresten dugu, eta emakumeentzako hiri aske baten alde egiten dugu, askatasunean bizi ahal izateko", dio testuak.
Azkenik, bat egiten dute "Iruñean egiten diren komunikatuekin eta deialdiekin", eta mugimendu feministak deitzen dituen protesta ekitaldietan parte hartzera gonbidatzen dituzte Iruñeko herritarrak nahiz egunotan bertan diren guztiak.
Tratu txarrak pairatzen badituzu edo kasuren bat ezagutzen baduzu, deitu doako telefono hauetara: 900 840 111 (EAEkoa), 016 (Espainiako Estatukoa) edo 3919 (Iparraldekoa, eguneko 24 orduetan erabilgarri, igande eta jaiegunetan 09:00etatik 18:00etara izan ezik). Ez dute fakturan arrastorik uzten, baina bai telefonoan. Beraz, ez ahaztu ezabatzea.
Gizarteari buruzko albiste gehiago
Bilboko Aireportuko suhiltzaileen kamioi bat Sondikako haur-parke batera erori da
Eusko Jaurlaritzako Segurtasun Sailak jakinarazi duenez, ezbeharra 06:20ak aldera gertatu da, eta ez da inor zauritu. AENA enpresa publikoak, suhiltzaileen kamioia kudeatzen duenak, istripuaren nondik norakoak aztertzen ari da.
212 urte, Ingelesek eta Portugaldarrek Donostia erre zutenetik
Urtero legez ekitaldi ugarirekin oroitu dute gertakaria. Goizean, esaterako, Donostiako Udalak lore eskaintza egin du Itxas atean goizeko elizkizunaren ostean, 1813 hartan hil ziren donostiarren omenez.
Suteen okerrena igaro da: Espainia alerta eta jarraipen fasera igaro da
Amaitutzat jotzen da Espainiako historia hurbilean baso-suteen gertakaririk tragiko eta suntsitzaileenaren faserik zailena: 300.000 hektarea baino gehiago erre dira, lau lagun hil dira eta 48 zauritu.
Palestinari elkartasuna adierazi diote Bilbon
Ongi Etorri Errefuxiatuak elkarteak bilkura egin du Bilbon. Palestinako herriari babesa adierazi diote bertan, eta haren aldeko aldarrikapenak egin dituzte.
Etxauriko gainean, Ziritzan, piztu den sutea kontrolpean dago
Haizeak sua bizitu duen arren, ez da arriskutsua izan inguruko etxebizitzentzat, nahiz eta Na-700 errepidea itxi behar izan duten bi noranzkoetan.
Mozkortzearen ondorioak simulatzen dituen alkoholik gabeko lehen garagardoa sortu dute
Erresuma Batuko laborategi batek mozkorturik egotearen efektua lortzen duen alkoholik gabeko lehen garagardoa egin du: Sentia Spirits. Ondoezak ez du luze irauten, edan eta hogei minutu edo ordu erdira desagertzen baita horren eragina, eta ez du biharamunik uzten.
Irailarekin batera, neguko ordutegiak itzuliko dira garraio publikora eta TAO zerbitzura
TAO zerbitzua ohiko ordutegietara itzuliko da udan ezarritako aldaketen ondoren. Itzulera hiriko trafikoaren gorakadarekin eta lan-jardueraren gorakadarekin bat dator.
Emakume bat hil eta hiru pertsona zauritu dira Lemoan izandako auto-istripu batean
Ezbeharra 01:40 aldera gertatu da. Ertzaintzak ikerketa abiatu du gertatutakoa argitzeko.
Artzai Egunaren 57. edizioa ospatuko dute Uharte Arakilen igande honetan
Uharte Arakilen egingo den Artzai Eguneko gazta lehiaketak Jose Mari Ustarroz izena hartuko du, duela gutxi hil zen Idiazabal Gaztaren Jatorrizko Deiturako presidente ohiaren lana eskertzeko.
Otsagabiak 100 urte atzera egin du, 1925era, Orhipean jaiarekin
Nafarroako herrian Orhipean jaia ospatu dute larunbat honetan, antzinako lanbide eta tradizioak erakutsiz.