Horrela eragingo dio Behobia-Donostia lasterketak trafikoari

Behobia-Donostia lasterketa herrikoia egingo da igande honetan. Proba honek eragina izango du trafikoan, autobusen ibilbide eta geltokietan, TAO zerbitzuan eta lurrazpiko aparkalekuetan.

Donostiako Udalak ohar batean jakinarazi duenez, Boulevard zumardia itxita egongo da 05:00etatik 17:00ak arte. Tarte horretan, ibilgailuak ezingo dira Peñaflorida kalera sartu. Lasterketa amaitu arte, ibilgailu partikularrak (egoiliarrak izan ezik) ezingo dira Boulevardera sartu Askatasunaren hiribidetik.

Zurriola hiribidea ere, Lapurdi plazatik, itxita egongo da 08:30etik 09:00etara, azken kilometroko arkua muntatu ahal izateko. Egoera bertsuan egongo da 09:30etik desmuntatzeko lanak amaitu arte (15:15ean, gutxi gorabehera).

09:30etik 15:00etara, lasterketaren ibilbidea errazteko asmoz, mugikortasun agenteek itxi egingo dituzte erdialderako norabidea duten kale hauek: Jose Elosegi, Ategorrieta, Nafarroa, Zurriola eta Boulevard. Hiriko irteeretan ez da gorabeherarik izango, eta gainerako bideak irekita egongo dira.

09:30 eta 13:00ak bitartean, Ulia pasealekuko bizilagunak Mendiola bidetik Herri Ametsa ikastolara joan beharko dira, eta handik Bidebietara.

Halaber, hiriaren ekialdetik irten edo hirira sartzeko, Gi-20 saihesbidea erabiltzeko gomendatu dute, Intxaurrondo, Marrutxipi (lotura berria Monsen) eta Altza lotuneetatik. Grosera iristeko, ordea, Loiolako Erriberako sarbidea edo Karlos I.aren hiribidea erabiltzeko aholkatu da.

Lasterkariak hurbildu ahala, erabat eragotziko zaie era guztietako ibilgailuei zirkuituan sartzea edo hura zeharkatzea. Hiriaren erdialderako sarbideak, une batzuetan, San Martin kaletik egongo dira itxita, eta, beste batzuetan, Askatasunaren hiribidetik.

Garraio publikoa erabiltzeko gomendioa egin du Udalak. Dbus eta Lurraldebuseko autobusei eta geltokiei ere eragingo die lasterketak, eta Euskotrenek eta Renfek zerbitzu bereziak antolatu dituzte.

Aldaketak aparkalekuetan eta TAO zerbitzuan

Hiriko aparkalekuetan ere eragina izango du probak. Horrela, TAO 1-1 sektoreko aparkaleku-bereizgarria duten egoiliarrek baimena izango dute hiriko gainerako sektoreetan aparkatzeko, baldintza berdinetan. Baimen hori ostiraletik astelehenera egongo da indarrean, biak barne. Dena dela, egoiliar horiek ezingo dute ibilgailua dohainik aparkatu ordainketa nahitaezkoa den guneetan (15 eremuko guneetan), araututako ordutegiaren barnean.

Bestalde, lurrazpiko aparkalekuen egoera honakoa izango da: Boulevardeko parkingeko erabiltzaileak Boulevard-Hernani bidetik prestatutako erreitik irten ahal izango dira egun osoan. Sartzea, baina, debekatuta egongo da 09:45 eta 14:30 bitartean. Kursaalekoan, ibilgailuak Nafarroa hiribiderantz irten beharko dira 10:30 arte, baina korrikalariek lehentasuna izango dute. Erabiltzaileak ezingo dira irten 10:30etik 14:30era, gutxi gorabehera. Okendoko aparkalekuan, ezingo da Argentinako Errepublikara sartu 09:45 baino lehen. Okendo kaleko irteera 10:30etik aurrera itxiko dute, eta, ordutik aurrera, irteera Argentinako Errepublikatik egingo da kontrako bidetik, Espainia Plazaraino. Azkenik, Kontxan, Andia kaleko sarbidea 05:30ean itxiko dute. Askatasunaren hiribideko sarrera eta irteera irekita egongo dira egun osoan zehar.

60. Behobia-Donostia lasterketa, zuzenean, ETB1en eta eitb.eus-en

09:45etik aurrera zuzenean ikusi ahal izango da lasterketa ETB1en eta eitb.eus-en.