Palestinako genozidioaren aurkako eta euskal selekzioaren aldeko aldarriek bat egingo dute larunbatean Bilbon

Bilboko San Mames estadioak hartuko duen Euskal Selekzioa-Palestina lagunarteko partidarako lau egun falta direnean, hainbat alderdi eta elkartek dei egin dute kirol hitzordua Palestinaren eta euskal selekzioaren aldeko aldarrikapen bihurtzeko. 

Euskal Selekzioak etxean inoiz bildu dituen ikusle gehien espero dira Palestinaren aurkako neurketan: 50.000 sarrera saldu dituzte, hiru astean. Iker Goñi Euskal Futbol Federazioaren presidenteak esan du "historikoa" izango dela larunbatean biziko dena, eta herritarrei dei egin die "aldarrikapena" eta "festa" uztar ditzatela, jai-giroan, eta lasaitasunez.  

"Hori da nazioarteko komunitateak gugandik espero duena. Larunbatean gertatuko denak oihartzun handia izango du", erantsi du. 

EAJ eta EH Bildu

Alderdi abertzaleek ere bat egin dute aldarrikapen bikoitzarekin. EAJk, bere aldetik, adierazi du kirol-ekitalditik harago, euskal selekzioa aldarrikatzeko, Palestinako herriari elkartasuna adierazteko eta bake iraunkorra eskatzeko eguna izango dela. 

Jeltzaleen izenean, San Mamesen izango dira, besteak beste, Aitor Esteban EBBren presidentea, Iñigo Ansola BBBren burua eta Andoni Busquet burukidea, alderdiko 200 gazte baino gehiago bertan izango direla. 

Ildo beretik, EH Bilduk ere Bilboko kaleak "modu masiboan eta aldarrikatzailean betetzeko deia" egin du. "Euskal Herria erreferente izango da, berriz ere, Palestinarekiko elkartasunean. Herri ukatutik herri ukatura. Herri zapaldutik herri zapaldura", esan du Arkaitz Rodriguez EH Bilduko Ekintza Politikoko idazkariak.

San Mames atarian, agerraldia egin du Rodriguezek, Diana Urrea legebiltzarkideak, Garazi Perea eta Jabotxa Fernandez Bilboko Udaleko zinegotziek eta Irati Jimenez Nafarroako Foru Parlamentuko parlamentariak lagunduta. 

"Euskal Herria nazio bat da, Palestina bezalaxe, eta eskubide osoa du selekzio ofizialak izateko, eta etorkizun librea eta demokratikoki erabakitzeko aukera izateko", esan du koalizioko Ekintza Politikoko arduradunak. Bere hitzetan, "elkartasuna ekintzetan" oinarritzen dela erakutsiko du euskal gizarteak larunbatean, eta "harro sentiaraziko gaitu". "Inoiz baino beharrezkoagoa da genozidioa salatzen, mobilizatzen eta palestinarren eskubideak defendatzen segitzea. Ez baita ezer amaitu", erantsi du. 

Mobilizazioak

Hainbat mobilizazio daude deituta larunbaterako. Horien artean, nagusienak, bi manifestazio. Bata, 17:30ean abiatuko da Arriaga Plazatik, Gernika-Palestina, Gu ere bai eta Gure Esku herri-plataformek deituta, "Herri libreak. Euskal Herria, Palestina. Genozidioa stop!" goiburupean. EH Bilduk deialdi horrekin egin du bat.

Ordubete geroago, 18:30ean, Areatzatik beste manifestazio bat aterako da, Palestinarekin Elkartasuna taldeak eta Athleticen jarraitzaileek deituta (Iñigo Cabacas Herri Harmaila, Bultzada, Indar Gorri eta Iraultza, besteak beste). 

Eguerdian, bestalde, 13:00ean, Arriaga plazan ekitaldi bat egingo da, euskal kirolari ezagunen parte-hartzearekin, Palestinari elkartasuna adierazteko.