Genozidoaren amaiera eta ofizialtasuna eskatu dituzte milaka lagunek Euskal Selekzioa-Palestina partidaren aurretik

Milaka pertsonak bat egin dute Gernika-Palestina herri ekimenak Gure Esku eta Gu ere bai! elkarteekin batera deitutako kalejira solidarioarekin Bilbon, Euskal Selekzioa-Palestina partidaren atarian.

Bi bandera, palestinarra eta ikurrina, eraman dituzte manifestazioaren buruan, "Euskal Herria Palestina. Genozidioa stop" zioen pankartarekin batera. Manifestariek "Boikot Israel. Palestina askatu" oihu artean zeharkatu dute Bilbo.

17:30 jota zirenean abiatu da martxa Arriaga Antzokiaren ataritik, San Mamesera bidean. Manifestazioa amaitzeko, Jesusen Bihotzean bildu dute jendea, bi selekzioen autobusak iristearekin batera harrera egiteko, eta, azkenean, aurresku bat izan da San Mames atarian.

Gernika-Palestina: "Genozidioaren amaierako partida jokatuko da gaur Bilbon"

Igor Meñika Gernika-Palestina herri ekimenaren bozeramailearen hitzetan, "elkartasunaren, anaitasunaren, giza eskubideen eta nazioarteko zuzenbidearen partida jokatuko da gaur Bilbon, baina, batez ere, gaur jokatzen den partida genozidioaren amaieraren partida da. Euskal gizarteak hori jokatzeko konpromisoa duela ikusten ari gara, eta gaur, batez ere, Palestinak irabaziko du".

Pello Otxandiano buru zuen EH Bilduko ordezkaritza bat ere izan da  manifestazioan. Koalizio independentistako kideek aste honetan bertan Ramallahn (Zisjordania) egindako ikurrina eraman dute San Mamesera, "Jordaniako muga zeharkatu eta blokeoa, ezarritako mugako kontrolak eta Israelen zapalkuntza gainditu ondoren", azaldu dutenez.

"Gaurkoa oso egun garrantzitsua" dela defendatu du Otxandianok, "ukatutako bi nazio, aitortu gabeak, San Mamesen elkartzen direlako, existitzeko eskubidea eta justizia eta bakerako eskubidea" aldarrikatzeko.

Sira Rego Espainiako Gobernuko Gazteria eta Haurtzaro ministroa ere bertan izango zela iragarri dute.

Palestinarekin Elkartasuna mobilizazioa ere oso jendetsua izan da

18:30ean Palestinarekin Elkartasuna taldeak bultzatutako beste martxa bat abiatu da Areatzatik, Palestinari elkartasuna adierazteko eta Euskal Selekzioaren ofizialtasuna eskatzeko. Hainbat kirol animazio talde atxiki dira deialdira, hala nola Iñigo Cabacas Herri Harmaila, Bultzada, Indar Gorri eta Iraultza.

Kasu honetan ere, milaka pertsonak bat egin dute "Gora palestina erresistentzia!" lelopean egin den manifestazioarekin. 20.000 izan dira, Bilboko Udaltzaingoaren arabera.

Hasierako pankartan, futbolari baten irudia ikus zitekeen, metraileta batekin eta zapi palestinar batekin, Netanyahuren buruarekin futbolean jolasten. "Israel estatu terrorista", "Gora palestinar erresistentzia"eta "Palestina askatu, Israel suntsitu" izan dira gehien entzun diren leloak.

Bengalak eta petardo hotsak ikusi eta entzun dira ibilbide osoan. Lau edukiontzi erre dira, Eusko Jaurlaritzako Segurtasun Saileko iturriek jakitera eman dutenez. Halaber, Ertzaintzako agenteen aurka bengalak, petardoak eta botilaren bat jaurti dituztela ere esan dute iturri horiek.

Martxa hasi aurretik, plataforma horretako kidea den Iñigo Rodriguezek esan du "ospakizun eguna" dela, baina, "batez ere, aldarrikapen politikorako eguna, erresistentzia palestinarraren defentsan, bere herriaren borrokaren defentsan eta Israelgo Estatua desagertzeko beharraren defentsan". 

Gainera, 19:00etan, beste mobilizazio bat ere izan da. Komunitate unibertsitarioak deituta,  kasu honetan, San Mamesetik gertu dagoen Ingeniaritza Eskolatik abiatu da, "herri palestinarrak aske izateko duen eskubidea" aldarrikatzeko. 

Polizia-dispositibo handia zabaldu dute larunbat honetan Bilbo osoan, manifestazioak direla eta.

Ordu batzuk lehenagotik, Ertzaintzaren helikopteroa ikus eta entzun zitekeen hiriburuan, eta istiluen aurkako ertzainak eta hiriko hainbat tokitan jarrita daude.