Lau urteko espetxe zigorra ezarri diote Donostiako Katalunia plazako aparkalekuan emakume bat bortxatu zuen gizonari

Kartzela zigorraz gain, zortzi urteko urruntze neurria bete beharko du, eta epe horretan ezingo du emakumearekin harremanetan jarri. Halaber, 8.000 euroko kalte-ordaina eman beharko dio.

2024ko irailean Donostiako Katalunia plazako aparkalekuan emakume bat bortxatu zuen gizonak lau urteko espetxe zigorra onartu du ostegun honetan, Fiskaltzarekin eta biktimaren akusazio partikularrarekin akordio batera iritsi ostean.

Lortutako akordioari esker, Gipuzkoako Auzitegiko Hirugarren Sekzioan egitekoa zen ahozko ikustaldia bertan behera utzi da, eta, beraz, biktimak ez du deklaratu beharko.

Kartzela zigorraz gain (akusatuak urte eta erdi inguru darama behin-behineko espetxealdian), zortzi urteko urruntze neurria bete beharko du, eta epe horretan ezingo du emakumearekin komunikatu.

Era berean, behin kartzelatik aterata, sei urte eman beharko ditu zaintzapeko askatasunean, eta ezin izango da eta adingabeekin zerikusia duen edozein jarduera eta lanbidetan aritu. Horrez gain, 180 euroko isuna ordaindu beharko du, eta emakumeari 8.000 euroko kalte-ordaina eman beharko dio (4.000 euro ordaindurik ditu).