Osakidetzak "txertaketa sistemaren segurtasuna" indartuko du, "berehalako eta epe ertainerako" neurriekin 

Osakidetzaren txertaketa-sistemaren segurtasuna indartuko duela iragarri du Eusko Jaurlaritzako Osasun Sailak. Horretarako, epe laburrean eta ertainean hobekuntzak egingo dira hainbat alorretan: tresna digital berriak, derrigorrezko prestakuntza eta protokolo zorrotzagoak ezarriko dira, besteak beste. Akatsik ez egitea eta herritarrek konfiantza izan dezatela bermatu nahi da.

Ohar batean, Osasun Sailak eta Osakidetzak jakinarazi dute "oso-osorik" onartu dituztela Txertoen Ikerketa eta Trazabilitate Batzordeak egin berri duen txostenean jasotako ondorioak eta hobekuntza-proposamenak, iazko abenduan eta aurtengo urtarrilean iraungitako txerto hexabalenteak jarri zirela atzeman ondoren.

David Cantero Osakidetzako Kalitate zuzendariordeak gidatzen duen batzordeak maila teknologikoan, antolaketan, prestakuntzan eta familiekiko harremanetan proposatu ditu hobekuntzak, eta epe jakin batzuk ere planteatu ditu. 

Zabaldutako oharrean, Alberto Martinezek zuzentzen duen Sailak ezarri beharreko neurriak abian jartzeko "kronologia" azaldu du. Bertan zehazten denez, bi hilabeteko epean erosketa-orriak ikuskatuko dira, osasun-zentroetan txertoak eskatzeko eta jasotzeko protokolo korporatiboa garatuko da, zentro guztietan txertaketa arduradun bat izendatuko da eta hozte-ekipoak kudeatzeko protokolo berria landuko da, besteak beste.  

Bestalde, 6-12 hilabeteko epean, berriz, teknologia eta antolakuntza mailako hobekuntzak egin asmo dituzte, eta horretarako, sistemari "sendotasun handiagoa eta iraunkorra" emango dion neurri-sorta diseinatu da. Tartean, zeharkako tresna digitala sortzea aurreikusten da, "urrats bakoitzean jakiteko zer txerto dauden, non dauden, zer loterekin eta zer iraungitze-datarekin".  Iraungitako txerto bat erregistratzea edo jartzea eragotziko duen alerta sistema bat ere aktibatuko da, eta langileek etengabeko prestakuntza egin dezaten bematuko da.

Sistema "eraginkorra", baina "hobetu beharrekoa"

Gasteizen egin du agerraldia Martinezek, Txertoen Ikerketa eta Trazabilitate Batzordeko arduradunek lagunduta, txostenaren berri emateko. Ondorioetako bat da "txertaketa-zirkuituaren zenbait fasetan" egon zirela akatsak.

Lehen akatsa 2023an izan zen; ohi baino txerto gehiago erosi ziren eta, ondorioz, ohi baino dosi gehiago gorde ziren. Horrela, 2025era arte iritsi ziren txerto horien dosiak, eta 6.300 baino gehiagok sei hilabetetik beherako iraungitze-epea zuten. Osasun-zentroek txertoak eskatu zituztenean, 2023ko lote batzuk iritsi eta trazabilitatea galdu egin zen.

Halaber, hozkailuak aztertzean akats bat egin zela azaldu dute, ez dagoelako protokolo bateraturik hori egiteko.

Martinezek nabarmendu du iraungitako txertoa hartu zuten haurrak ez zirela inoiz arriskuan egon, eta arazoa atzeman orduko Osakidetza osoko sistema aztertu zela, arazoaren "dimentsioa" zenbaterainokoa zen jakiteko. Haren hitzetan, Osakidetzaren txertaketa sistema "eraginkorra" da, baina aitortu du ez dela "hutsezina" eta "hobekuntzak behar" dituela. 

Agerraldian, bestalde, jakinarazi dute 2017an ere gutxienez iraungitako 17 txerto jarri zituela Osakidetzak Debagoienan.