Migratzaileen ezohiko erregularizazioa ostegunean hasiko da telematikoki, eta astelehenean, aurrez aurre

Espainiako Gobernuak gaur onartuko du migratzaileen ezohiko erregularizazioa. Urtarrilean iragarri zuten gaiaren inguruko akordioa PSOEk eta Podemosek, eta aurreikusten da milioi erdi laguni baino gehiagori egingo diola mesede neurriak.

Egoera irregularrean dauden migratzaileentzako izapideak ostegun honetan, apirilaren 16an, abiatuko dira, telematikoki, eta hilaren 20an, aurrez aurre, Elma Saiz Gizarteratzeko, Gizarte Segurantzako eta Migrazio ministroak aurreratu duenez. Tramiteak egiteko bulegoetara bertaratzeko hitzorduak ere ostegun honetatik aurrera eskatu ahal izango dira.

Elma Saiz ministroak, Cadena Ser irrati-katean egindako elkarrizketa batean, mezu lasaigarria helarazi die prozesu horren onuradun izan daitezkeenei, eta adierazi du tartea egongo dela eskaera guztiak izapidetzeko, "datozen lekutik datozela".

Atzo hedabideen aurrean egindako adierazpenetan, Felix Bolaños Presidentetzako, Gorteekiko Harremanetarako eta Memoria Demokratikoko ministroak jakinarazi zuen Gizarteratze, Gizarte Segurantza eta Migrazio Ministerioko teknikariak azken ukituak ematen ari zaizkiola errege-dekretuari, Estatuko Kontseiluak egindako oharrak aintzat hartuta. 

Ministroak esan zuen neurria "Justiziazko ekintza" bat dela, eta "eskubiderik gabe" lanean ari diren milaka herritarrak hemendik aurrera "Gizarte Segurantzari eta Ogasunari ekarpena" egingo dietela. Haren hitzetan, ongizate estatuak "baliabide gehiago" izango ditu erregularizazioari esker. 

Ebazpenean, Estatuko Kontseiluak oro har ontzat eman du Espainiako Gobernuak prestatutako testua, eta bereziki nabarmendu du "bateratzailea" dela. Nolanahi ere, hainbat ohar helarazi dizkio neurria ondu duen aditu taldeari, testua "hobetzeko". Besteak beste, onuradunek aurrekari penalik ez dutela ziurtatzeko prozedura "moldatzea" proposatzen da. 

Erantzunkizuneko adierazpena

Hain zuzen ere, azken gomendio horri erantzunez, Espaniako Gobernuak kendu egin du migratzaileen erregulariozaziorako Errege Dekretuaren testutik eskatzaileek, aurrekari penalik ez dutela frogatzen duen dokumenturik lortu ezin badute, erantzunkizunpeko adierazpena aurkezteko aukera. 

Testuaren negoziazioko iturriek agentziei baieztatu dietenez, aurreko zirriborroetan bazegoen aukera hori. 

Estatuko Kontseiluaren ohartarazpenaren ondotik dator Exekutiboaren erabakia. Izan ere, aholku-organo horren arabera, erantzukizunpeko adierazpenaren formula ez da egokia milaka migranteren egoera bideratzeko. Erakundearen arabera, "prozesuaren onuradunei eskatzea zentzuzko den baldintza justifikaziorik gabe lasaitzea" ahalbidetu dezake, eta "atea irekitzen die Atzerritarrei buruzko Lege Organikoan jasotako baldintza orokor horren kontrako jardunbide ez oso zorrotz eta, are, irregularrei". 

Tramitazio-epea

Gehienez, hiru hilabete iraungo du izapideak, baina behin eskaera onartutakoan bertan (eskaera egiten denetik gehienez 15 egun luzatuko da) hasi ahal izango dira lanean.

Baimenak edo erregularizazioak bizileku-baimena eta lan-baimena dakartza berekin, eta balekoa izango da Estatu osoan eta sektore guztietan. Hasierako baimena urtebetean egongo da indarrean, eta ondoren, Atzerritarren Araudiak jasotzen dituen aukeretara jo ahal izango da.